En il decurs da l'avust e settember ha l'Uffizi da chatscha e pestga dal Grischun constatà en pliras regiuns da nov lufs giuvens. En tut ha il chantun dumbrà fin la fin da november 70 novs luffins da 13 trieps sin territori grischun.
Strategia da regulaziun
Il BAFU ha dà la lubientscha per sajettar dus terzs dals luffins . Quai surpiglia la surveglianza da chatscha. Plinavant duain vegnir eliminads l'entir triep dal Vorab, Corn da Lantsch e Fuorn. Tar quell'incumbensa duain er chatschaders e chatschadras pudair gidar. En la regiun dal Beverin è in singul luf vegnì sajettà, la lubientscha da sajettar in ulteriur luf singul datiers da Brusio è scadida senza success.
Trais novs trieps
Il november è vegnì constatà ina reproducziun tar lufs sin il territori da Soazza en Mesolcina. Quest triep vegn numnà Forcola e viva per gronda part en l'Italia ed il territori dal triep na cuntanschia betg il fund da la val sin vart Grischuna, sco l'uffizi da chatscha scriva. Actualmain datti 13 trieps en il Grischun.
Il sulet triep senza reproducziun il 2024 è quel da Glattwang. Il chantun na menziuna betg pli il triep en sia charta da survista.
La fin d'avust è vegnì constatà ina reproducziun tar il Calanda. Il chantun ha numnà quest nov triep Calanda2. I dat là almain dus luffins.
Il fanadur ha il chantun constatà in nov triep en il Partenz, e numnà quel Älpetli. Sco triep vala tenor il chantun ina gruppa da trais lufs ch'èn ensemen da viadi. Gia ils emprims mais da l'onn hai dà fastizs dad almain dus lufs en la regiun. Cun l'observaziun d'almain trais chagniels po l'uffizi confermar l'existenza dal triep.
Dapi la regulaziun dal triep dal Beverin datti tenor il chantun strusch pli indizis da preschientscha da lufs, malgrà che la regiun vegn survegliada en la medema moda e maniera sco auters territoris. Plinavant na dettia nagins indizis per dapli che dus animals. Cunquai na datti betg pli il triep da Beverin
L'uffizi ha gia pli baud constatà che la preschientscha da lufs al Wannaspitz è sa reducida suenter ch'il bab dal triep era vegnì sajettà. Entant ch'i dettia anc lufs en il territori, na quintia quai betg pli sco triep. Il bab dal triep era vegnì sajettà, perquai ch'ina persuna nunenconuschenta aveva blessà el. Avant ha l'uffizi gia regulà il triep e sajettà ina luffa ed in luf giuven .
Triep da Stagias
In luf oriund dal Tessin è il schef dal triep, ensemen cun ina luffa oriunda dal triep da Stagias. Il fanadur ha il chantun constatà almain otg luffins en il territori. Il chantun ha la lubientscha da sajettar tschintg luffins. Gia l'avust 2023 avevi dà ina dumonda da regulaziun dal chantun pervia dad «activitad da donn speziala». Il triep ha tranter auter era stgarpà ina sterla sin l'Alp Nalps en Val Tujetsch. Entant èsi gartegià la primavaira 2024 da fermar in emettur vi d'ina luffa dal triep, sin il territori da la vischnanca da Medel. La luffa è tenor l'analisa genetica naschida il 2023 tar il triep da Stagias
Triep dal Fuorn
Gia il segund onn en fila hai dà pitschens en quest territori, ed era quest onn ha il chantun pudì constatar novs luffins. En tut èn vegnids confermads l'avust set luffins pitschens. Il mastgel e la femella sin il Pass dal Fuorn èn là dapi il 2016. Ils lufs geniturs han ins pudì cumprovar geneticamain. Cun la reproducziun da la stad 2023 ha l' Engiadina gì l'emprima reproducziun da lufs dapi passa 100 onns. En il plan da regulaziun 2024/25 èsi previs d'eliminar l'entir triep. Set lufs èn vegnids sajettads enfin la fin da november.
Triep da Muchetta
Ils zercladur 2024 ha la surveglianza da chatscha pudì confermar trais lufs pitschens tar il triep che viva sin il territori da las vischnancas Bravuogn, Filisur, Schmitten e parts da Tavau. Suenter la mort da l'anteriura luffa dominanta l'entschatta dal 2024 èsi nuncler, tge femella che ha procurà per ils pitschens. Il bab è tenor la supposiziun dal chantun il luf dominant d'enfin uss.
Triep da Calderas
Gist nov novs luffins han il luf e la luffa dominanta dal triep che sa mova d'omaduas varts da la Gelgia da Mulegns fin a Casti, e vinavant en il sid da l'Alvra fin a Sola. Ch'il triep haja pitschens era gie cler la stad, ch'i sajan gist nov ha il chantun pudì cumprovar mez settember. Ils geniturs ha il chantun pudì confermar a moda genetica en il decurs da la primavaira. Quai ha era gidà d'identifitgar dus ulteriurs lufs dal triep cun l'annada 2022. In da quels animals, ina luffa, viva actualmain en la regiun da l'Engiadin'Ota.
Triep da Valgronda
Per almain in luffin è creschì il triep che sa mova tranter Mustér, Glion e vers sid da la Lumnezia en sur il Glogn ora. Il 2024 han ins confermà in luffin tar il triep, el vegn cunquai betg regulà. La fin dal 2023 sa cumponiva il triep tenor il chantun da trais animals. Il mastgel dal triep ha ditg purtà in emettur da GPS, quel è dentant crudà ora mez december 2023 ord raschuns nunenconuschentas. Il luf viva dentant anc, sco in maletg d'ina trapla fotografica mussa.
Triep dal Vorab
Quest triep duai vegnir eliminà cumplettamain. El ha ses territori tranter Vuorz, Trin, Valendau e Versomi. Dapi ils 15 da fanadur sa il chantun d'almain otg novs chagniels dal triep. L'onn passà avevi gia dà set chagniels. L'onn 2023 era quest triep creschì sin set lufs. En tut eran trais lufs (dus giuvens ed in pli vegl) vegnids sajettads en la perioda da regulaziun 2023/24. En il plan da regulaziun 2024/25 èsi previs dad eliminar l'entir triep. Enfin la fin da november 2024 han ins sajettà sis lufs.
Triep da Moesola
Il triep ch'è sin il territori da la vischnanca da Mesauc e Valragn ha tenor indicaziuns dal chantun sis luffins, quels èn vegnids observads mez avust 2024 da la surveglianza da chatscha. Pli tard han ins pudì confermar in ulteriur luffin. Quatter luffins èn vegnids sajettads enfin ils 8 da november, la regulaziun da quest triep è per il mument terminada. Il luf dominant avevan las autoritads sajettà l'onn 2022 senza la lubientscha da la Confederaziun.
Triep dal Beverin
Era il terz quartal dal 2024 n'han ins chattà nagins fastizs per l'existenza da pli che dus lufs en il territori dal Beverin – uschia na vala quella preschientscha betg sco triep. Tuttina haja dà en il decurs da la stad donns vi d'animals da niz. En quest connex ha il chantun pudì cumprovar in animal feminin ch'era enfin uss anc nunenconuschent. Las analisas geneticas dals geniturs mancan anc e vegnan a mussar sch'i sa tracta d'in animal giuven da l'onn 2023 u d'in luf immigrà che sa mova en quest territori. En il territori duain tut ils animals vegnir eliminads. L'entschatta dal november 2022 aveva l'uffizi da chatscha sajettà il luf dominant perquai ch'il triep aveva stgarpà animals da niz. Avant ch'il chantun ha cumenzà a regular il triep dal Beverin d'antruras, cumpigliava quel en tut 13 animals.
Triep da Rügiul
En tut ha il triep da Rügiul tschintg luffins. Quels hajan ins pudì cumprovar la fin da settember, scriva il chantun. Il chantun Grischun ha la lubientscha da l'Uffizi federal d'ambient per sajettar dus terzs dals lufs giuvens dal triep da Rügiul. Ils 18 da november ha il chantun confermà la regulaziun da trais lufs. Il december passà avevan organisaziuns da la natira fatg recurs cunter l'emprima dumonda da regulaziun per quest triep. Il recurs è anc pendent avant Dretgira administrativa Grischuna.
Triep dal Corn da Lantsch
Il 2021/22 è sa furmà il triep dal Corn da Lantsch en il conturn pli grond enturn la vischnanca da Lai. L'emprim n'eri betg segir, sch'i sa tractia da lufs dals trieps vischins (Muchetta, Calderas). Analisas geneticas dal 2023 han però confermà ch'i saja in agen triep. En il plan da regulaziun 2024/25 èsi previs dad eliminar l'entir triep. Sis lufs èn vegnids sajettads fin la fin da november. En tut ha il triep tschintg luffins da quest onn.
Triep da l'Älpetli
Suenter pliras observaziuns da lufs sin il territori communal da Claustra ha il chantun constatà la stad in nov triep e numnà quel Älpetli. L'avust ha ina persuna lura pudì far in video nua ch'ins vesa en tut set luffins da quest triep. Ils lufs geniturs lufs en quest territori eran gia vegnids cumprovads en il decurs da l'onn 2024.
Ulteriuras cumprovas ed observaziuns da lufs
En differentas regiuns hai dà cumprovas da singuls lufs. Uschia hai er dà en il terz quartal cumprovas d'almain dus lufs en la Mesolcina . Er dus lufs èn vegnids cumprovads sin il cunfin dal Tessin e Grischun al sid da la Moesa . In singul luf è cumprovà en la Bregaglia.
Gia pli baud, numnadamain en il segund quartal avevi dà differentas cumprovas per lufs en l'Engiadina. Sper il triep dal Fuorn hai dà en l'Engiadina Bassa observaziuns d'almain dus lufs ch'èn ensemen en gir (d'in datti gia ina cumprova genetica, da l'auter anc betg). Er en l'Engiadin'Ota datti in pèr da lufs. L'animal feminin derivia dal triep da Calderas, danunder che l'animal masculin deriva saja nunenconuschent. Quest pèr da lufs sa movia per gronda part en il territori tranter S-chanf e Samedan . In ulteriur pèr da lufs dettia tranter San Murezzan ed il Pass dal Bernina .
Stgarps
Lonn 2024 èn 206 nursas e chauras vegnidas stgarpadas da lufs, plinavant 4 animals da niz gronds. L'onn 2023 èn 267 animals vegnids stgarpads. L'onn 2022 èn cun 517 dubel uschè blers animals vegnids stgarpads.
Regulaziun levgiada
La lescha da chatscha revedida è ida en vigur il prim da settember 2023. Gia dapi il prim da fanadur è l'ordinaziun revedida en vigur. Quella fa pli lev da sajettar lufs. A partir dal prim da december pon ils chantuns regular ils trieps proactivamain, quai munta senza ch'igl ha dà stgarps. Igl è lura era pussaivel da sajettar entirs trieps .
Regulaziun da lufs problematics
Dals trais lufs problematics che n'eran betg part d'in triep è vegnì sajettà in il schaner 2022 sin il territori da Cumpadials , el aveva stgarpà il 2021 in vadè. Ils 24 da settember 2023 ha in chatschadur cun autorisaziun dal chantun pudì sajettar ina luffa . Ella era part d'in pèrin ch'ha chaschunà donns sin la Börteralp sin il territori da Claustra.
Era la luffa veglia dal Calanda ha l'Uffizi da chatscha sajettà pervia da ses mal stadi fisic e pervia d'ina mancanza da distanza e cumportament da fugia envers umans. L'examinaziun da l'animal ha mussà, ch'igl è vegnì sajettà duas giadas sin el. Pervi da quest agir illegal ha il chantun purtà plant pervia da fraud .