Ils pasturs da l'Alp Nalps han chattà l’animal stgarpà da circa 200 kilograms il mardi avantmezdi. Ina gronda part da l’animal avevan ils lufs gia maglià. Sco Arno Puorger da l’Uffizi da chatscha e pestga ha confermà ad RTR va l’uffizi da quai anora ch’i sa tractia dal triep da Stagias ch’haja attatgà la sterla.
Il maletg al lieu mussia ch’i sajan stads plirs lufs en acziun. Tenor la nova ordinaziun da chatscha ch’è ida en vigur il prim da fanadur possia il chantun uss tschentar la dumonda a la Confederaziun da regular il triep. Sche la surveglianza da chatscha po cumprovar ch’i saja stà il triep da Stagias lura po ella sajettar da nov dus terzs dals chagniels. En il mument fissan quai trais dals tschintg chagniels.
La finamira: sajettar il luf dominant
Per regular il triep tanschi sche la surveglianza da chatscha po observar il triep. La finamira n'è dentant betg da sajettar uschè spert sco pussaivel trais chagniels. En mira dal chantun è il luf dominant, quel è numnadamain in nov, damai ch'il vegl schef dal triep maina uss il triep dal Beverin. Il nov mastgel M187 è immigrà dal Tessin ed ha là gia stgarpà l'onn passà animals gronds. Sch'il chantun po cumprovar cun ina analisa da DNA che M187 ha stgarpà la sterla po l'uffizi dumandar la lubientscha da sajettar il mastgel creschì. El valess lura sco luf problematic. La lubientscha da sajettar valess dentant pir dal november fin schaner.
Stagiun d'alp periclitada
Il chantun vegn pia sin il pli a sajettar spert dus chagniels per salvar l'opziun da sajettar il luf dominant, di Arno Puorger envers RTR. Per la muaglia sin l'Alp Nalps resta la situaziun pia anc in mument tendida. Ils 130 arments han ils purs migrà sin in'autra pastira da l'autra vart da la val. Il pur da la sterla stgarpada è malsegir. En il mender cas, ch'igl avess anc da dar ulteriuras attatgas da lufs stoppian ils animals bandunar l'alp pli baud.
