Nus avain empruvà da stgatschar il luf cun dar sbratgs e cun bittar pals ma il luf n’ha betg laschà liber da la vatgas.
Tut las emprovas da spaventar il luf èn stadas adumbatten. La finala è il pur ì per la buis da chatscha ed ha scurrentà il luf cun in sajet.
En la glisch da l'auto avain nus vis ch’il luf è sa vulvì e danovamain ì envers la muntanera. En gliez mument sas ti exact tge che succeda, il luf attatga danovamain la muntanera e ti n'has nagina schanza. Alura has ti la buis enta maun e fas quai che ti has da far.
Suenter il sajet alarmescha Elias Casanova immediat la surveglianza da chatscha e la Polizia chantunala. Quellas vegnan sin il plaz e protocolleschan il succedì.
Il cas sa tschenta tar la procura publica
La procura publica dal chantun Grischun avra ina procedura penala ed examinescha il cas. Suenter mez onn survegn l'inculpà ina disposiziun da la procura publica. Lezza renfatscha al pur d’avair cuntrafatg a la lescha d’armas e vul dar ina multa da plirs tschients francs. Elias Casanova fa recurs encunter la disposiziun.
Bunamain tuts han scusseglià. Tgi ch’ins dumandava, tuts schevan, na, ta na lascha betg en sin quai, na fa betg quai. Jau sun dentant adina stà persvadì d’avair fatg nagut fauss. Alura avain nus tuttina fatg il recurs.
La procura publica examinescha ina ulteriura giada il cas e vegn anc ina giada in mez onn pli tard a la conclusiun ch’il pur haja reagì en in stadi d’urgenza e n'haja betg cuntrafatg a la lescha d’armas. La procedura è vegnida sistida ed il pur è uschia vegnì declerà sco nunculpant. Sin la dumonda da RTR daco che la procura publica haja mida opiniun tranter l’emprima e la secunda decisiun scriva quella:
Nach der Einsprache hat die Staatsanwaltschaft die Untersuchung ergänzt und ist dann zum Schluss gekommen, dass der Bauer in einer Notwehrsituation gehandelt hat. Das Strafverfahren ist demzufolge eingestellt worden.
Cun quella decisiun è il pur vegnì declerà nunculpant d'avair cuntrafatg a la lescha dad armas. Ma tge vul questa decisiun ussa dir exact? Vala la decisiun da la procura publica sco cas da precedenza e po mintga pur ussa sajettar cura ch'in luf s'avischina a sia muntanera? Sin questas dumondas dat Adrian Wyss, in advocat spezialisà sin il dretg penal, resposta:
Il cas è vegnì sistì pervia d’in uschenumnà stadi d’urgenza. Quai èn adina cas spezials e singulars. Il stadi d’urgenza vegn applitgà cura ch’ins fa insatge che na fiss da principi betg lubì, sco per exempel sajettar cun la buis, e las autoritads vegnan suenter e dian ch’igl era avant maun ina situaziun ch'ha giustifitgà quai.
Vinavant ha il giurist ditg che mintga cas che pertutga il stadi d’urgenza vegn giuditgà da las dretgiras per sasez. En il cas concret da Siat haja la procura publica gì da giuditgar sche la mesira ch'il pur ha prendì saja stada en relaziun cun quai ch’el ha vulì proteger, numnadamain sia muntanera.
En quai cas èsi cler, ch’il pur ha agì en relaziun a la situaziun. Quai perquai ch’el ha sajettà controllà suenter ch’el aveva fatg tut il pussaivel per empruvar da stgatschar il luf. El aveva fatg tut il pussaivel avant che scurrentar il luf cun in sajet.