La notg da la sonda sin dumengia ha la surveglianza da chatscha chantunala sajettà in terz luf dal triep da Wannaspitz. Sco l'Uffizi da chatscha dal Grischun scriva en ina communicaziun, saja il luf giuven vegnì sajettà sin il territori da la vischnanca da Lumnezia.
L'Uffizi federal d'ambient aveva dà ils 28 d'october la lubientscha per sajettar dus ulteriurs lufs giuvens dal triep dal Wannaspitz. In da quels dus lufs giuvens è gia vegnì sajettà ils 30 d'october sin ils territori da Val.
L'emprima intervenziun dal chantun
L'emprim luf dal triep è vegnì sajettà glindesdi ils 3 d'october. La surveglianza da chatscha ha sajettà ina luffa datiers d'ina vischnanca en Lumnezia. La luffa giuvna era stada dapi ils 6 da settember en mira dal chantun. Lura aveva l'Uffizi federal per l'ambient BAFU dà la lubientscha per sajettar in dals lufs dal triep dal Wannaspitz. La raschun ch'il chantun aveva dumandà per ina lubientscha da sajettar in luf è ch'il triep dal Wannaspitz aveva stgarpà 10 nursas, malgrà mesiras da protecziun.
Tut ils trais cadavers èn vegnids transportads en il Center per medischina d'animals a Berna per in'examinaziun patologica. L'examinaziun genetica succeda alura entras l'Universitad da Losanna.
