L'october passà ha il veterinari chantunal, Giochen Bearth infurmà ch'el saja alarmà pertutgant la tuberculosa tar ils tschiervs en il territori dal Montafon sur il cunfin en l'Austria. Sche la malsogna arrivass propi en il Grischun, pudess'ins be cumbatter ella cun intensivar la chatscha ed uschia sajettar grondas quantitads da tschiervs. In scenari problematic fiss dentant sche tschiervs infectads arrivassan en il Parc Naziunal Svizzer – perquai ch'intervenziuns da l'uman èn da princip scumandadas là.
Chantun pudess pretender mesiras radicalas
Fin ussa n’han ins anc betg registrà cas en il Parc Naziunal Svizzer. Excluder ch'i pudess dar cas da tuberculosa en l'avegnir, na pon ins dentant betg. E sche tals cas vegnissan documentads, lura vegniss la lescha d’epidemia en vigur. Quella avess tenor Flurin Filli, vicedirectur dal parc naziunal, però consequenzas fitg negativas, perquai ch'il chantun pudess alura pretender la chatscha sin las bestgas infectadas en il parc naziunal.
Quai cuntrafaschess a la filosofia dal Parc Naziunal Svizzer. A mai faschess quai mal da lubir la chatscha en il Parc Naziunal Svizzer, nua che la natira duai vegnir surlaschada ad ella sezza.
Tenor Flurin Filli saja la chatscha sin tschiervs en il parc naziunal schizunt cuntraproductiva. Uss s'inscuntran ils tschiervs en blers lieus en il parc naziunal. Entras ina chatscha dettia dentant pli paucs lieus nua ch'ils tschiervs vegnissan ensemen. Quests lieus fissan per las bacterias che chaschunan la tuberculosa terren favuraivel per siglir da bestga a bestga, uschia che la situaziun daventass bler pli precara.
Tschiervs vegnan survegliads pli ferm en il Partenz
Suenter ch'ins aveva cumprovà dus cas en il Montafon en l'Austria la stad passada, prenda il chantun mesiras pli fermas per impedir ina derasaziun sur cunfin.
Ils dus tschiervs sajan vegnids sajettads la fin d'avust sin il territori da l'alp Tilisuna en il Gampadelstal (Montafon). En il rom d'in program da surveglianza èn els vegnids testads sin tuberculosa cun agid da la metoda PCR – il resultat dal test è stà positiv. En il fratemp datti ulteriurs cas da suspect en il territori damanaivel dal cunfin.
Il chantun prenda mesiras
Per impedir che l'epidemia d'animals dal Montafon sa derasia en direcziun dal Grischun, ha l'Uffizi per la segirezza da victualias e per la sanadad d'animals decis d'intensivar las controllas en ils territoris communals da Seewis, Grüsch, Schiers, Luzein, Küblis e la fracziun Saas a Claustra. En questa regiun determinada ston vegnir prendidas emprovas d'in terz dals tschiervs che vegnan sajettads durant la chatscha auta e durant la chatscha spezialisada. Plinavant er da tut ils tschiervs che vegnan sajettads tras prelevaziuns da tgira u che vegnan chattads morts. Dals animals ch’ils chatschaders han sajettà ston els prender glondas dal begl e dal lom per controlla. Glondas dal culiez taglia il guardiaselvaschina sez ord l’animal.
Scumond da pavlar vala vinavant
Tant ils animals da niz sco er ils animals selvadis valan en Svizra sco libers da tuberculosa. Perquai ch'ina part da la populaziun da tschiervs en tschertas regiuns da l'Austria è dentant contaminada cun tuberculosa, vala dapi l'onn 2016 in scumond per persunas privatas da pavlar selvaschina d'ungla (tschiervs, chavriels, chamutschs, capricorns) en la regiun da cunfin cun il Vorarlberg e cun il Tirol. Il scumond è vegnì prolungà ils 3 da zercladur 2024 per ina durada illimitada.
Or da l'archiv
