Passa 50 lufs sajan vegnids sajettads l'enviern passà en Svizra. Pussaivel era quai perquai ch'il Cusseglier federal Albert Rösti aveva midà las reglas. Il davos ha lura dentant la dretgira administrativa fermà la chatscha sin plirs trieps.
Uss sa mussia quant dispitaivel che questa revisiun saja stada entaifer l'administraziun sezza. Documents che sajan avant maun al Tagesanzeiger, mussian co ch'ils funcziunaris en l'uffizi federal da giustia hajan reagì sin quests plans dal cusseglier federal Rösti e lur secretari general Yves Bichsel.
L'avrigl avant in onn hajan las emploiadas ed emploiads da Rösti interrogà auters departaments davart ils plans. En ina emprima valitaziun haja la giurista responsabla en il departament da giustia crititgà plirs puncts. Per exempel che la convenziun da Berna na saja betg vegnida menziunada. Quella saja da la lescha anora superiur a l'ordinaziun. Plinavant dettia era conflicts cun la lescha da chatscha, perquai che là saja scrit ch'ins stoppia prender resguard sin animals protegids, sco per exempel il luf.
La populaziun saja periclitada
Quai che na saja dal tuttafatg betg cumpatibel cun la lescha saja la proposta da dar liber per sajettar giu entirs trieps. La lescha na lubeschia quai betg, haja num en la posiziun dal departament. Era il dumber minimal da 12 trieps ch'è vegnì fixà en l'ordinaziun saja arbitrar e nagliur vegnì argumentà. Ins stoppia adina garantir che la populaziun surviva – quai confurm ad obligaziuns internaziunalas e la lescha da chatscha, haja num en il departament da giustia.
En sia resposta ha il departament fatg attent che las expertas ed ils experts dal post da coordinaziun da l'ecologia dad animals da rapina ch'èn vegnids engaschads da la Confederaziun, hajan quintà cun bler dapli trieps. E che quest dumber sa differenzia fitg en il sboz. Il Cussegl federal haja plinavant gia ditg davant il parlament ch'il dumber da 20 trieps saja adattà per la Svizra. Il dumber duai garantir che la populaziun restia capabla da surviver.
Il settember curt avant che la chatscha sin lufs ha cumenzà, sajan ils departaments federals puspè vegnids envidads per dar giu ses commentaris. Tar il departament da giustia sajan ins lura stà surprais che mo paucas propostas sajan vegnidas resguardadas.
La giurista responsabla haja sinaquai pretendì da discutar quai cun il departament federal d'ambient. Ma suenter il discurs saja la giurista anc adina stada malcuntenta cun il resultat, be singulas passaschas sajan vegnidas adattadas. La convenziun da Berna per exempel, na saja vinavant betg vegnida menziunada.
Dumber da trieps na vegnia betg midà
Era davart il dumber da trieps haja la giurista discutà cun la manadra da project dal Bafu. Ma quest dumber na veglian ins betg midar ed er betg argumentar, haja gì num.
Il davos vegnia probabel la giustia a decider. Perquai ch'i dat anc intgins recurs che sajan anc avert tar il Tribunal administrativ federal cunter ordinaziuns da sajettar intgins trieps en il Grischun sco er en il Vallais – ed uschia indirectamain cunter l'ordinaziun da chatscha.
