En Svizra han lufs stgarpà quest onn 29% damain animals da niz. Quai ha l'emissiun Schweiz Aktuell dad SRF rapportà.
Il 2022 avevan lufs stgarpà, enfin la fin da settember, 1'200 animals da niz. Quest onn èn quai enfin la fin da settember 850 animals da niz. La pli gronda diminuziun han ins registrà en il chantun Glaruna cun in minus dad 80%.
En il Grischun è il dumber sa sminuì per la mesadad. Ed er ils chantuns Vallais e Tessin han tenor Schweiz Aktuell cifras pli bassas. Stabil sajan ils stgarps dentant stads en ils chantuns Vad e Son Gagl.
Pro Natura vesa las mesiras da protecziun sco raschun principala
Questa reducziun haja tenor l'organisaziun d'ambient Pro Natura da far cun ina megliera protecziun d'animals da niz, sco Sara Wehrli, la responsabla per la politica da chatscha da l'organisaziun ha ditg en l'emissiun da televisiun. In'ulteriura pussaivladad fiss che la pastriglia protegia la muntanera cun saivs d'electricas cunter lufs.
I dettia dentant animals singuls e darar er entirs trieps che hajan emprendì da guntgir las mesiras da protecziun da muntaneras. En quests cas possian ins dentant gia oz intervegnir e sajettar giu ils lufs e decimar uschia ils trieps.
Mesiras da protecziun mo la mesa vardad
Il president da l'uniun da l'allevament da nursas, Lukas Berger, ha in'autra explicaziun daco ch'igl ha dà damain stgarps. Tenor el haja quai plitost da far cun quai ch'ins mettia damain animals da niz si ad alp pervia dal luf. Blers pasters sajan psichicamain al limit. Mintga stgarp saja in da memia, ha el ditg vinavant.
Co proteger meglier las muntaneras?
Ord vista da Pro Natura è in’ulteriura extensiun da la protecziun da las muntaneras la soluziun. Pertge 80% dals stgarps han lieu en muntaneras che na vegnian betg protegidas. Il budget per la protecziun da muntaneras saja quest onn gia stà duvrads si il zercladur. I saja cler che la protecziun da muntaneras stoppia vegnir finanziada vinavant da la Confederaziun.
Era Lukas Berger sustegna las mesiras da protecziun da muntaneras. Dentant dettia per part era stgarps en muntaneras protegidas. Plinavant na possian ins era betg proteger tut las alps, pervia da la topografia. Berger mettia perquai sin la nova ordinaziun da chatscha federala. Quella prevesia ch'ins possia sajettar en l'avegnir preventivamain entirs trieps, senza ch'in luf haja stgarpà avant in animal da niz.