Cumenzà aveva la corporaziun da vischnancas SanaSurselva gia l'onn 2017 cun in project da crear ina rait da sanadad. L’emprima emprova aveva dentant fatg naufragi suenter che las chasas d'attempads na vulevan betg sa participar a la rait. Avant passa trais onns ha cumenzà la segunda emprova da metter sut in tetg il provediment da sanadad en Surselva.
La «Reit da sanadad Surselva SA»
La finamira da la «Reit da sanadad Surselva SA» è tenor la Sana Surselva il provediment da servetschs da sanadad, che s'orientescha als basegns da la populaziun. L'idea è perquai d'unir las instituziuns da sanadad en Surselva:
- La corporaziun da vischnancas SanaSurselva fundescha ils 28 da favrer ina societad acziunara, la «Reit da sanadad Surselva SA».
- Acziunarias da questa nova societad daventan otg instituziuns da sanadad ed 11 da las 15 vischnancas sursilvanas.
- L'intent da questa societad è da reunir en l'avegnir las instituziuns da sanadad sut in tetg. Ins veglia lavurar pli stretg ensemen e metter ensemen tschertas partiziuns sco l'informatica/IT e l'administraziun, sco era crear in consorzi per il persunal, in «pool».
- En in emprim pass duain las structuras instituziunalas vegnir messas en pe, quai cun in cussegl administrativ, ina ubain in mainafatschenta e persunas responsablas per ils champs a restructurar (armonisaziun cundiziuns d'engaschament, informatica/IT, post da coordinaziun). Ils custs per quellas funcziuns muntan a 750'000 francs.
- 2027 duess quest nov manaschi daventar operativ.
Questas instituziuns daventan acziunarias:
- Steinhauser Zentrum, Sursaissa
- Casa s. Martin, Trun
- Casa s. Giusep, Cumpadials
- Pflegewohngruppe, Vals
- Ospital Regiunal Surselva, Glion
- La Pumera, Glion
- Spitex Foppa, Glion
- Spitex Cadi, Rabius
Ina rait betg cun tut ils exponents
La Sana Surselva ha durant ils davos onns adina puspè preschentà propostas a las vischnancas purtadras ed a las instituziuns pertutgadas, co che la rait da sanadad per la Surselva pudess vesair ora. Da las 15 vischnancas da la Surselva han quatter decidì da betg sa participar a la nova societad acziunaria. Ed era quatter instituziuns da sanadad han decidì da betg sa participar.
Betg part da la rait fan las vischnancas da:
Betg part da la rait fan las instituziuns:
- Chasa da tgira Puntreis a Mustér
- Chasa da tgira Da Casa Val Lumnezia
- Spitex Selva, Laax
- Claustra da las Dominicanas, Glion
Bandunar la corporaziun e purtà plant
Las vischnancas da Laax e Schluein n'han betg be decis da betg far part a la rait da sanadad mabain van anc in pass vinavant. Ellas bandunan la corporaziun da vischnancas Sana Surselva. Ultra da quai han las vischnancas purtà plant tar la Dretgira administrativa. Las vischnancas rinfatschan che la Sana Surselva n'haja betg protocollà correct il decurs d'ina radunanza dals delegads il settember 2023.
