In'ulteriura chasa da tgira na sa participescha betg a la Reit da sanadad Surselva. Mathias Bundi, il president dal cussegl da fundaziun dal Da Casa Val Lumnezia, ha confermà envers RTR la decisiun. I spetgian pliras sfidas ils proxims onns. Gist pliras persunas dal cader vegnian pensiunadas l’auter onn ed els sajan vi da reorganisar l’entira structura.
Sco Mathias Bundi ha ditg veglian els l’emprim far quels pensums avant d’entrar en ina collavuraziun. L’idea d’ina collavuraziun en il sectur da sanadad beneventian els da principi, ma il mument anc senza Da casa Val Lumnezia. Era betg part da la Reit da sanadad fa la chasa da tgira Puntreis a Mustér.
Cumpadials e Spitex Cadi van en la rait
Las duas instituziuns da la Cadi che n’avevan anc betg decis, la Casa Sogn Giusep a Cumpadials e la Spitex Cadi sa participeschan a la Reit da sanadad. Els hajan decis dad ir en la rait per ils proxims dus onns, ma els hajan in catalog cun giavischs e pretensiuns, ha Lucas Tuor, commember dal cussegl da fundaziun ditg sin dumonda. Per els saja da gronda impurtanza da pudair mantegnair quai ch'è bun. Era la Spitex Cadi ha decis d’entrar en la rait da sanadad. Impurtant saja ch’els vegnian prendids serius da l’instituziun nova, ha ditg il president da la Spitex Cadi René Epp. Era els vegnian segir a restar uss dus onns ma suenter era trair bilantscha e lura decider nua che la via va en l’avegnir.
