Las duas vischnancas da Laax e Schluein portan plant envers la corporaziun da vischnancas «Sana Surselva». La rinfatscha è ch'i manchia la transparenza en connex cun la situaziun finanziala dal Spital regiunal Surselva.
Schluein e Laax han purtà plant tar la Dretgira administrativa. En in document ch'è en possess da RTR rinfatschan las duas vischnancas che la Sana Surselva n'haja betg protocollà correct il decurs d'ina radunanza dals delegads il settember 2023. Tenor la glista da tractandas han ils delegads gì da decider davart ina finanziaziun supplementara da l'ospital da 5,8 milliuns francs. En il protocol da questa radunanza stettia dentant scrit ch'ils delegads hajan era decidì sur d'ina garanzia da deficit nunlimitada, quai che na saja tenor las vischnancas da Laax e Schluein betg succedì.
Damai che la suprastanza da la Sana Surselva na haja betg reagì sin lur scrivers na hajan las duas vischnancas tenor il president communal da Schluein, Ralf Schläpfer, gì nagina autra pussaivladad che da far in plant. La presidenta da la Sana Surselva, Martina Beeli, n'ha betg vulì prender posiziun en chaussa damai ch'i sa tractia d'in cas current.
