Suenter che las vischnancas da Laax e Schluein avevan annunzià avant 10 dis ch'ellas na sa participeschian definitivamain betg a la nova Reit da sanadad Surselva SA, van ellas in pass pli lunsch. Ellas bandunan la corporaziun da vischnancas SanaSurselva ch'è responsabla per il provediment da sanadad en la Surselva. Lur demissiun han Laax e Schluein annunzià per il proxim termin da visada, sin la fin da l'onn 2025. A Laax haja la suprastanza communala gia decidì davart quest pass, a Schluein duai la radunanza communala avair il davos pled.
La raschun principala è ch'ins na sa laschia betg en sin ina discussiun.
Sco ina da las raschuns ha il president communal e delegà da Schluein, Ralf Schläpfer, inditgà che las duas vischnancas n'hajan betg survegnì resposta sin pliras brevs ch'ellas hajan tramess a la suprastanza da la SanaSurselva. Respostas davart l'avegnir da l'ospital regiunal Surselva e tge mesiras che quel prendia encunter il deficit, manchian.
Las rinfatschas che la SanaSurselva n'haja betg respundì, renviescha la presidenta da la SanaSurselva, Martina Beeli. Las vischnancas da Laax e Schluein hajan scrit a l'ospital regiunal Surselva per survegnir scleriment davart la situaziun finanziala. Ma uschè spert na possia ni la SanaSurselva ni l'ospital regiunal vegnir cun las respostas dumandadas.
Plinavant hajan las vischnancas da Laax e Schluein dumandà en in scriver da midar il protocol da la radunanza dals 12 da settember 2023, perquai ch'i na saja betg stà transparent sch'ins haja gia decidì davart insatge che n'era betg tractanda. Las duas vischnancas han ussa fatg ina protesta tar la dretgira administrativa dal chantun Grischun.
Buna critica è adina buna ed ins chatta uschia era bunas schliaziuns. Ins sto discurrer in cun l'auter.
Per la corporaziun saja adina donn sch'i dettia vischnancas che bandunian la corporaziun da vischnancas, uschia Martina Beeli. Quels che hajan decidì da far quest pass, hajan fatg sias ponderaziuns, manegia ella.
Ils pass da Laax e Schluein giuditgescha Martina Beeli sco extrems ed ella na saja betg segira tge che haja muventà las duas vischnancas da far quest pass. I saja ussa da sclerir tge che quai munta exact, insanua stoppian Laax e Schluein far las cunvegnas da prestaziun per il provediment da sanadad.
Falera na sa participescha betg a la Reit da sanadad SA
La vischnanca da Falera na sa participescha per il mument betg a la nova rait da sanadad, cunquai che cun Glion, Laax e Schluein manchian impurtantas vischnancas per quest project, uschia il delegà da Falera durant la radunanza dals 20 da december 2023. I saja uss impurtant ch'ins vegnia cun tuts enturn ina maisa per manar vinavant quest project, uschia il delegà vinavant.
La radunanza dals delegads da la SanaSurselva ha decidì cun 18 encunter 8 vuschs da cuntinuar cun las lavurs vi dal project. Quai cun preparar l'integraziun ed il svilup dal manaschi da la Reit da sanadad Surselva SA ed accordar in credit da 55'000 francs per las lavurs latiers.
La fundaziun da la societad acziunaria duai vegnir fatga il favrer 2024, quai tenor Martina Beeli, la presidenta da la SanaSurselva.
