Schaner
«L'ultim Rumantsch» è ina seria che raquinta l'istorgia da la famiglia Durisch ch'è possessura e gestiunaria da la pli gronda chasa da medias dal Grischun. Cur ch'il patrun e fundatur Gion-Peder mora, rumpa ora in cumbat da pussanza en la famiglia. La seria en tschintg parts è vegnida publitgada il schaner. Il november 2025 suonda la segunda staffla da «L'ultim Rumantsch».
Favrer
Il management da lufs en il Grischun ha er occupà fermamain il 2024. Dapi il december 2023 lubescha ina ordinaziun da regular la populaziun da lufs da moda proactiva ed er da pudair regular entirs trieps che fan fastidis. Quai è ina midada da paradigma en la politica da lufs. Durant il december e schaner èsi lura vegnì fatg chatscha proactiva da lufs.
Concurrenza da chors
Cuira è daventà il favrer mecca da la szena da chors. A chaschun da la concurrenza da chor svizra èn 66 chors da l'entira Svizra cun enturn 1'900 chantaduras e chantadurs vegnids a Cuira a dar concerts d'inscunter, da motto e da gala e la finala er per sa mesirar en differentas categorias. RTR ha fatg differentas registraziuns durant la fin d'emna da concurrenza.
Registraziuns da RTR
Mars
Il mars curran mintgamai millis sportistas e sportists da Malögia a S-chanf a chaschun dal Maraton da skis engiadinais. RTR rapporta dals strapazs sportivs, da las istorgias a l'ur e tge lavurs ch'i dovra per preparar il traject per la pli gronda cursa populara da la Svizra. Questa giada han er ils dus podcasters da RTR Marcus Petendi ed Elias Tsoutsaios prendì sut ils skis ils passa 42 kilometers, quai senza avair gronda experientscha da passlung.
Avrigl
RTR fa be program per persunas veglias? Durant dus dis han ils giuvens e las giuvnas da RTR surpiglià il program e decis tge che vegn emess. Ellas ed els han discurrì davart temas che tutgan il puls dal temp, laschà vegnir a pled persunas giuvnas e gizzà las ureglias per la musica da la scena giuvna.
Premi da medias catolic
La schurnalista rumantscha Paula Nay ha survegnì il premi spezial da medias da la conferenza dals uvestgs svizzers. Ella è vegnida undrada per ses film «Suenter la plievgia vegn il sulegl», ch'ella ha fatg en il rom dals Cuntrasts.
Matg
Il 2024 ha il Grischun festivà 500 onns dapi la fundaziun dal stadi liber da las Trais Lias e la Cadi ha festivà 600 onns Ligia Grischa. A chaschun da quests giubileums hai dà differentas producziuns culturalas, occurenzas ed exposiziuns.
Zercladur
Questa stad ha la natira ina giada dapli mussà tut sia forza. Plievgia intensiva e bovas han aifer curt temp devastà vias, la cuntrada ed era bajetgs en Val Mesolcina. Quatter persunas èn vegnidas sutteradas dal material ch'è vegnì a val. Suenter la miseria en la val hai dà gronda solidaritad cun ils pertutgads ed ils abitants e las abitantas han piglià enta maun lur destin.
Festa da chant e da musica
A Trun èsi vegnì chantà. 30 chors cun daquai dad en tut 950 chantaduras e chantadurs han embellì il vitg da Trun cun lur chant a chaschun da la 46avla festa da chant districtuala en Surselva. RTR ha fatg numerusas registraziuns.
A Claustra èsi vegnì sunà. En tut èn 60 societads da musica s'inscuntradas per la festa chantunala da musica dal Grischun. Questa festa datti per regla mintga tschintg onns. RTR ha fatg registraziuns da las producziuns.
Fanadur
Mintga onn il fanadur daventa la Lumnezia tribuna per il pli grond festival da musica dal Grischun. Da bellezza aura èn millis fans da musica sa radunads a Degen per festivar, s'incuntrar ed esser ina giada dapli part da l'Open Air Lumnezia.
Avust
Avant 200 onns èn Augustin Biscuolm e Placi Curschellas muntads sco emprims fin sisum il Tödi. RTR ha realisà in film istoric da la ruta sin il pli aut piz da la Surselva e dal chantun Glaruna. En memoria als pioniers èn dus teams sa mess sin viadi, ma sin differentas rutas. La gronda sentupada spetga sin il piz.
Novitads dal di
Per savair tge che capita en il Grischun, la Svizra e sin il mund porscha RTR dapi la stad in newsticker che resumescha sin in'egliada las impurtantas novitads dal di. Sper quai datti ina resumaziun auditiva dals temas centrals da mintga di, ch'ins po tadlar linear a las 18:00 e las 19:00 en il radio u cura e nua ch'ins vul sin la pagina d'internet. La purschida remplazza las novitads linearas da la saira.
La survista dal di cun las pli impurtantas novitads per tadlar curt e cumpact.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Settember
Ils 11 da settember 1924 ha la «Radiogenossenschaft Zürich» emess per l'emprima giada ina emissiun da radio en lingua rumantscha. RTR ha celebrà quest giubileum da las undas rumantschas ch'i dat dapi 100 onns.
October
Il Big Air a Cuira stat per ina cumbinaziun da highlights sportivs e musicals. Gia per la terza giada è Cuira stà lieu ospitant per cumenzar la cuppa mundiala da Big Air uschebain per ils skiunzs sco er ils snowboardists che mussan trics sin la schanza gronda da l'Obere Au.
Suenter ch'il futur da l'event da sport e musica è ditg stà intschert, èsi uss cler ch'il Big Air fa pausa il 2025. Quai pervia da las lavurs da construcziun per la nova halla d'event sin l'Obere Au a Cuira. I saja difficil cun il plaz, han ils organisaturs communitgà.
Minisguard sin visita en scola a Rueun
Scolaras e scolars da Rueun han fatg contribuziuns, intervistas e taglià material da film e tun ensemen cun la redacziun da Minisguard. A la fin da lur emna tut speziala n'han els betg be producì l'emissiun da Minisguard mabain er fatg ina chanzun ed in clip da musica.
November
Il film «Bun enfin miserabel» che mussa il stadi dal guaud en il Grischun ha gudagnà in premi. A chaschun dal Festival delle Foreste, è la schurnalista Bertilla Giossi vegnida undrada ed ha survegnì il premi principal per ses film, producì per ils Cuntrasts. Il festival vul dar a la populaziun la pussaivladad da scuvrir e sentir il guaud. Quai cun agid da films, fotografias e poesia.
Brinazuls – puspè pachetar las coffras
Dapi mez november è il vitg da Brinzauls puspè evacuà, ina bova da gronda spertezza pudess vegnir a val ils proxims mais. Gia per la segunda giada ha la populaziun da bandunar lur chasas, lur vitg e lur cuminanza. Cura e sche ils abitants e las abitantas pon turnar è intschert.
Sonda lunga
Durant l'occurrenza «Sonda lunga » è Cuira daventà tribuna, sala da concert e museum. 23 differentas chasas han avert lur portas per mussar lur purschidas. Er en la chasa da medias da RTR han pitschen e grond pudì far in gir e guardar davos las culissas.
December
Ensemen cun la Chadaina da Fortuna ha la SRG SSR appellà a la solidaritad cun ils pli giuvens. Sut il motto «Ensemen cunter violenza envers uffants en Svizra ed en l’entir mund» hai dà il december in di da rimnada. Er en chasa RTR hai dà ina centrala da telefon nua ch'ins ha pudì far donaziuns.