2023
Schaner
18 – 25-01, Soloturn
RTR è preschent cun dus films da «Cuntrasts» al Festival da film Soloturn. Da vesair èn stads «La meztga da chasa da Schlans» da Bertilla Giossi ed il film «Gion Gieri – il scolast dal vitg chala» da Petra Rothmund.
Favrer
23-01 fin 05-02, RTR
«Inclusiun – Ensemen unics – quai essan nus»! Sin tut ses chanals ha RTR laschà vegnir a pled persunas pertutgadas cun impediment che han raquintà da lur mintgadi ed il viver cun lur handicap.
Mars
01-03, RTR
Astrid Alexandre, redactura RTR, survegn per sia seria podcast «1,7 milliuins» il premi da medias da la Conferenza episcopala svizra per l'onn 2021. L’autura ha mess il focus sin diversas fassettas e sfidas en la vita da persunas cun impediments.
18-03, RTR
RTR ha envidà ad ina sairada cun Joachim Gauck, anteriur president da la Republica Federala Tudestga, en la chasa da medias a Cuira.
Avrigl
04-04, RTR
«Tgi eis Ti?» da ANIKK – Anik Casutt – è il 50avel Top Pop Rumantsch. Per la seria Top Pop Rumantsch maina RTR ensemen dapi 2005 artistas ed artists giuvens rumantschs cun producents da musica professiunals.
24 fin 28-04, Glion
Durant l’onn visita RTR quatter quartiers, va a la tschertga d'istorgias persunalas e prova da sentir il puls da la convivenza che sa zuppa en ils quartiers ordaifer dals centers.
- Avrigl: Quartier Schliras a Glion
- Zercladur: Quartier dal Rain (Rheinquartier) a Cuira
- Settember: Differents quartiers a Lai
- December: Quartier Scuol Ost
Matg
30-05, RTR
La fin da matg han cumenzà las lavurs da filmar per la nova seria rumantscha «L’ultim Rumantsch». Il drama da famiglia ficziunal è posiziunà en il martgà da medias plain tensiuns e gieus da cumbat ed è ina producziun da RTR e da l’interpresa Shining Film.
Zercladur
09-06, RTR
Ils Impuls dal Radio Rumantsch èn cult! Ils 29 d'october 1993 a las 6:30 è l'emprim Impuls ì sur l'emettur dal Radio Rumantsch en l'emissiun da la damaun, numnada Buna Luna. Ils davos 30 onns han var 150 auturas ed auturs prelegì di per di patratgs ed istorgias curtas ord lur mintgadi u lur fantasia. Per festivar il giubileum ha RTR envidà ad in emprim aperitiv litterar.
Fanadur
Mez fanadur
RTR lantscha ina concurrenza davart las differentas stgargiadas d’alp en il Grischun. Il public po trametter da nov fotografias da las stgargiadas e gudagnar in bel premi.
Avust
15 fin 19-08, Grischun
«Swiss Epic» è in’aventura da bike da tschintg dis sin ils trails legendars grischuns da Lai, San Murezzan e Tavau. Cun il livestream da RTR po il public suandar la cursa live davent da chasa.
Settember
La nova plattafurma da RTR per tarmetter salids digitals è online. Da nov po il public trametter cartinas cun spruchins rumantsch per mail a collegas e confamigliars.
Decodar nossa cultura sin srf.ch
La cultura rumantscha ha da raquintar bler. RTR gida da decodar nossa cultura. Ils fans da la lingua e cultura rumantscha pon consumar il cuntegn da DNC da nov ussa era via la home da srf.ch.
October
01-10, Nova manadra resursas umanas
Flurina Foppa (47) daventa nova responsabla resursas umanas RTR. Ella entra en uffizi l’entschatta 2024. Flurina Foppa è creschida si a Glion e Laax, ha studegià economia da manaschi a l’universitad da Son Gagl ed è sa perfecziunada cun diversas scolaziuns supplementaras en il sectur da HR/RU. Ella daventa successura da Daniel Wasescha (49) che ha lavura dapi 2001 tar RTR ed è vegnì elegì ils 20-08-2023 sco nov mastral da la vischnanca da Surses.
31-10, Laax
Durant l’onn ha RTR envidà a differentas premieras da film. L’ultima da l’onn 2023 ha gì lieu a Laax. Il film «Crescher per tut pretsch – il dilemma da Laax» dad Esther Berther sa fatschenta cun il svilup rasant da la vischnanca, dals avantatgs e da las sfidas che quel porta.
November
10/11-11, Turitg
RTR ha envidà ad in Festival dal film rumantsch en il kino Arthouse Uto a Turitg.
Al public interessà è vegnida preschentada ina vasta paletta da films realisads da RTR per ils «Cuntrasts». E per ils uffants è vegnì organisà in lavuratori da medias.
16-11, RTR
RTR ha envidà ad ina sairada cun Thomas Zurbuchen, anteriur directur scientific da la NASA, en la chasa da medias a Cuira.
December
02-12, Glion
RTR rinforza sia preschientscha en las regiuns e prenda dimora en novas localitads a Glion. A chaschun da la tradiziunala fiera d’advent han numerusas persunas visitià il nov biro e guardà sur las spatlas a collavuraturas e collavuraturs RTR.
20-12, Scuol e Savognin
A Scuol e Savognin vegnan prendidas en funcziun 2 gondlas cun il branding da RTR. En las gondlas chattan ils skiunzs e las skiunzas cuntegn da RTR e pon participar ad ina concurrenza. La finamira da las gondlas è da far attent il public ed ils fans da la lingua rumantscha sin la purschida da RTR.
