Big Air Chur 2024 - Organisaturs tiran bilantscha positiva dal Big Air 2024

Ils organisaturs tiran bilantscha positiva dal Big Air 2024. Era cun il dumber da visitaders e visitadras sajan ins cuntent, malgrà ch'ins ha spetgà daplirs, uschia ha ditg René Götz, CEO da la First Event AG envers RTR. Il 2023 avevan ils organisaturs anc pudì beneventar passa 27'000 visitaders e visitaders, quest onn eran quai 20'500.

Il futur dal Big Air a Cuira saja anc in pau avert. Quai malgrà ch'ils organisaturs cuntinuassan gugent cun quest event che cumbinescha sport e musica. I dat dentant inqual sfida: La finanziaziun è ina da quellas. In'auter problem saja il plaz. Sin l'areal da l'Obere Au, vegn la nova halla d'events da la citad construida. Pervia da quest plazzal n'hajan ins er anc betg pudì publitgar la data per l'auter onn. Ins saja actualmain er vid guardar cun la FIS e Swissski sch'i dat anc auters termins pussaivels en il chalender da las atletas ed atlets. Sco Götz ha ditg, vegnan ins en mintga cas ad organisar il Big Air 2025, dentant na possian ins anc betg dir cura exact, probabel in zic pli tard che usità.

Malgrà pli paucs visitaders e cifras cotschnas è René Götz persvadì ch'i vegn en il futur vinavant a dar il BigAir Cuira, dentant dovria vinavant era il chantun, citad e partenaris che sustegnan l'event cun meds finanzials.

Resultats: Giapun top sin snowboard

Sonda saira è stà il punct culminant or da vista sportiva cun il final dals umens sin il snowboard. Era qua ha in Giapunais dominà il Big Air a Cuira. Cun 177.25 ha Taiga Hasegawa mussà la meglra prestaziun.

I suondan Rocco Jamieson da la Nova Zelanda sin plaz dus e Romain Allemand da la Frantscha sin plaz trais.

Er tar ils umens n'ha nagin dals sis Svizzers pudì persvader e cuntanscher il final. Il meglier resultat ha fatg Alex Lotorto cun 61.25 puncts en la qualificaziun.

Sco gia l'onn passà han er quest onn las Giapunaisas dominà la concurrenza da las dunnas. Cun 181.50 puncts ha Mari Fukada - ch'ha be 17 onns – mussà la meglra prestaziun da las otg finalistas.

Sin plaz dus è sa tschentada la Giapunaisa, Reira Iwabuchi. Plaz trais va a la Canadaisa Laurie Blouin.

Per la suletta Svizra, Ariane Burri n'hai betg tanschì da sa qualifitgar per il final. Cun 27.5 puncts è ella vegnida 22avla en la qualificaziun.

Freeski: Mathilde Gremaud è ina classa per sai

Mathilde Gremaud ha gudagnà la cuppa mundiala da freeski ed ha cun sia 14avla victoria da la cuppa mundiala gì ina partenza perfetga en la nova stagiun. La Svizra romanda da 24 onns era ina classa per sai en il Big Air ed ha guadagnà cun 17,50 puncts avant Flora Tabanelli da l'Italia e Muriel Mohr da la Germania. Per ses megliers sigls ha Gremaud ramassà 178,50 puncts. «Igl è perfetg», sa legra la victura da l'onn avant. Crudads ora gia en la qualificaziun èn Sarah Höfflin (11), Elsa Sjöstedt (14) ed Anouk Andraska (15).

Sper Ragettli manchentan era ils ulteriurs Svizzers il final da freeski

Ils megliers umens svizzers, Andri Ragettli da Flem e Fabian Bösch, han sco lur collegas da squadra manchentà il final. Gudagnà ha Matej Svancer da l'Austria. Cun ses ultim sigl ed in total da puncts dal 186 ha el stuschà il Norvegiais Tormod Frostad da la testa.

Impressiuns dal Big Air 2024

L'influenza da l'aura

Tenor René Götz, il manader da l’organisaziun dal Big Air, n'han in pau plievgia e vent strusch influenza sin ils sportists sin la schanza – ma la plievgia possia retegnair gist giasts spontans da visitar l’occurrenza. Per il mument vegnan spetgadas en total enturn 20’000 visitaders e visitadras, ed ils organisaturs speran che quel dumber s'augmentia anc.

La scena da freestyle internaziunala a Cuira forsa per gia per l'ultima giada

Ils 18 e 19 d'october è stada la quarta ediziun dal Big Air Chur en la Obere Au. 150 da las meglras snowboardistas ed dals megliers skiunzs dal mund (or da 25 differents pajais) han mussà lur abilitads sin la pli gronda schanza en Svizra da la cuppa mundiala da freeski e snowboard da la FIS. Il Big Air Chur porscha sper freestyle e sport era musica live ed action. Ina cumbinaziun che duai far attractiva l'event tant per atletas ed atlets sco er per in publicum vast. L'idea è d'uschia pledentar tant il pulic interessa al sport sco er giuven e vegl che vul giudair musica e far festa. Sin l'areal da l'eveniment pon las visitadras ed ils visitaders far experientschas en il skate-parc, empruvar ora autras differentas activitads, giudair bun da mangiar u lura laschar ir a fin la notg cun far festa.

Il crutsch vi da l'entira chaussa è che l'event vegn uschia pli char e n'è er en la quarta ediziun betg finanziabel senza il sustegn dal maunc public – vul dir: senza daners tranter auter or da la cassa da la citad da Cuira na vai betg. Oriundamain era l'idea da be sustegnair ils prims onns l'event e silsuenter dueva quel purtar sa sez. Quai na para tenor las cifras actualas dentant betg da gartegiar. Vegn latiers che la citad da Cuira sto spargnar ed ha previs da stritgar las contribuziuns per il Big Air. Perquai è l'avegnir intschert. Quai malgrà ch'ils organisaturs sa mussan cuntents cun var 9'000 visitaders il venderdi e 11'500 la sonda.

Atletas ed atlets avant la concurrenza

Ariane Burri e Fadri Rhyner san co che quai è da star sisum la rampa. Il mument avant l'emprim sigl saja il mender, raquintan omadus atlets.

Er per il skiunz da freestyle Fadri Rhyner saja l'emprim mument sin la rampa intensiv, ma suenter quel vegnia el pli quiet.

Sa preparads per quest event èn omadus quasi tuttina: durant la stad sin l’uschenumnà «Airbag», in plimatsch d’aria, e pli tard era en naiv en l'Australia ed en la Nova Zelanda. Il difficil da la rampa a Cuira saja la fin sin la naiv artifiziala.

L'influenza da l'aura

Tenor René Götz, il manader da l’organisaziun dal Big Air, n'han in pau plievgia e vent strusch influenza sin ils sportists sin la schanza – ma la plievgia possia retegnair gist giasts spontans da visitar l’occurrenza. E l'onn passà han er pliras parts dal program sportiv stùi vegnir spustadas ed ils finals da freeski èn schizunt vegnids stritgads.

Program musical

Sin tribuna èn stads il venderdi 4 acts:

• Bonez MC – Headliner
• $oho Bani
• Mehnersmoos
• Lou Kaena

Quai èn stads ils 5 acts musicals da la sonda :

• Paul Kalkbrenner – Headliner
• Nemo
• Wanda
• 77 Bombay Street
• Happy for Real