Chadaina da Fortuna - 2,7 milliuns ha la Svizra rimnà cunter violenza envers uffants

Stan final da las 22:50 munta a 2'704'456 francs rimnads.

Milliuns d’uffants daventan mintg’onn la victima da violenza e da maltractament. En Svizra ed en l’entir mund pregiuditgescha questa violenza lur bainstar, lur access a la furmaziun ed a la sanadad e periclitescha lur futur. Perquai ha RTR appellà ensemen cun la Chadaina da Fortuna ils 19 da december 2024 a la solidaritad cun ils pli giuvens. L’acziun da solidaritad ha gì la finamira da sensibilisar la conscienza per la situaziun dals uffants, per la violenza fisica u psichica, negligientscha, abus u autras furmas da maltractament.

Di naziunal da collecta ils 19 da december 2024

Da la damaun a las 07:00 fin la saira a las 23:00 han prominents e voluntaris prì encunter ils telefons d’audituras ed auditurs. Tranter auter è la scola da talents da Cuira s'engaschada en la centrala da la Chadaina da Fortuna a Cuira. Persunas prominentas quel di èn stadas l’actur Andrea Zogg, il chantautur Mattiu Defuns, l’anteriur skiunz Carlo Janka u l’uvestg da Cuira, Joseph Maria Bonnemain.

En la centrala da telefons