Minisguard da Rueun da vesair:
Sonda las 17:40 sin SRF 1
Gievgia – gronda premiera plain fatschas rientas
Suenter 4 dis intensivs han ils uffants da la scola da Rueun pudì preschentar en la halla da scola a Rueun lur lavur dals davos dis. Ils megliers muments da radio, las contribuziuns dal Minisguard, las fotografias dals uffants da scoletta e sco punct culminant: la chanzun creada dals uffants sezs.
Quai che resta èn las fatschas rientas, experientschas nundumbraivlas e muments da cuminanza tranter ils uffants da la scola a Rueun ed RTR.
Mesemna – Cura che la creativitad frunta sin la lavur da team
Il terz di da l'emna da project è stà cumplettamain sut l'ensaina da la lavur da team e da la creativitad. Plaunet daventan or da las scolaras ed ils scolars mez profis uschia ch'ellas ed els lavuran pli e pli independentamain vi da lur projects. Ils uffants da la tschintgavla e sisavla classa han taglià las contribuziuns per lur emissiun da Minisguard, ed el medem mument han ils uffants da la terza e quarta classa preparà e realisà la segunda emissiun da radio.
Ils uffants da scolina han fatg ulteriuras fotografias captivantas che mussan lur vista creativa e la vita cuminaivla. Grond mument da la mesemna: filmar il video per la chanzun da la scola Rueun.
Er per la segunda ura da radio live ha Gaby survegnì sustegn da dus co-moderaturs, Lionel e Leano da Ruschein. Els han tranter auter preschentà ina contribuziun ch'ils uffants han fatg sezs davart la ruina dal chastè da Frundsberg a Ruschein.
Mardi – Emprima ura radio live e barat creativ
Il highlight dal mardi è stada l'emprima emissiun da radio tranter las 11:00 e las 12:00. Ils uffants da la terza e quarta classa han preschentà lur contribuziuns, tschernì musica e moderà plain buna luna. Tge bel da vesair ed udir co ils uffants han fatg lur emprimas experientschas live , plain creativitad e segirezza.
Ils uffants da scoletta han cumenzà a fotografar. La fotografias mussan lur vista sin lur dachasa e sin lur vitg. Era ils scolars pli vegls han lavurà plain engaschi vid l'emissiun dal Minisguard.
Cun filmar tagliar ed magari era planisar da nov. La chanzun dals uffants da Rueun daventa pli e pli concreta ed ils uffants pon strusch spetgar da la preschentar. In di plain sfidas creativas va a la fin ma era in di cun blers muments superbis!
La mesemna spetga lura la finiziun da la chanzun ed anc in'ura radio live
Glindesdi – Ord ideas naschan teams e products
Noss'emna a Rueun ha cumenzà oz sut il motto «creativ»! Fin gievgia saira preschentan las scolaras ed ils scolar a Rueun in'atgna chanzun, in'emissiun dal Minisguard, in'exposiziun da fotografias e mintga di in'emissiun da radio live. Ils uffants da scolina vegnan a far fotografias, ils uffants da la 3. e 4. classa fan emissiuns da radio live, ed ils uffants da 5. e 6. classa produceschan in'emissiun dal Minisguard.
L'emprim di è stà en il center l'emprender d'enconuscher, la tecnica è vegnida installada, las gruppas èn sa furmadas e las emprimas ideas creativas han sburflà. Ils uffants han lavurà plain entusiassem vi da lur projects. Gia oz han els mess il fundament per tut quai che suonda ils proxims dis. La collavuraziun en il team e l'energia creativa communabla èn stadas da sentir dapertut.
Cun grond plaschair ed engaschi avain nus passentà l’emprim di cuminaivel e nus avain mirveglias co ch'i va vinavant!
