Chatschaders e chatschadras n'han sajettà nagins lufs
En il december, durant la chatscha speziala, ha ina squadra da chatschaders e chatschadras sustegnì la guardiaselvaschina tar la chatscha proactiva sin lufs. Dentant n'han els gì nagina fortuna. Ils 9 lufs èn tuts vegnids sajettads da la guardiaselvaschina, sco che Arno Puorger, il responsabel per animals da rapina gronds da l'Uffizi da chatscha e pestga dal Grischun conferma.
Las cundiziuns èn stadas fitg grevas – cundiziuns da l'aura dentant er cundiziuns giuridicas sco il recurs da las organisaziuns d'ambient.
Cun quellas cundiziuns ed il temp fitg limità ch'ils chatschaders e las chatschadras avevan a disposiziun n'èsi ad els betg gartegià da sajettar lufs, declera Arno Puorger.
Finamira: 15 lufs
Per il mais da schaner, saja il chantun dentant optimistic. Las relaziuns da l'aura sajan bunas e la guardiaselvaschina motivada. La finamira saja da sajettar 15 lufs enfin fin schaner, tschertins dad els er enfin la fin mars.
Nus essan optimistics quai che pertutga la chatscha proactiva sin lufs il schaner – ina prognosa na pudain nus dentant betg anc far.
