La pli impurtanta elecziun da l'onn 2024 è segiramain stada quella dal president dals Stadis Unids da l'America. Cura ch'i va per eleger in president communal en ina vischnanca gischuna, lura na datti per il pli betg tals cumbats d'elecziun e l'interess è pli pitschen.
Cura ch'il president vul chalar e na po betg
Daventar president communal n'è betg adina ina lavur da siemi. Quai è dà en egl gia l'entschatta da l'onn 2024. Sin il prim da schaner 2024 ha la vischnanca da la Muntogna da Schons gì d'eleger il presidi. Il president actual, Marco Dolf, aveva abditgà ses post in mez onn avant
Jau hai ina famiglia cun uffants pitschens ed in manaschi puril. Lura hai jau hai fatg 20 onns politica, 18 onns da quai sun jau stà president communal. Ussa sun jau stanchel.
Suenter che la tscherna d'in successur era stada adumbatten s'ha Marco Dolf anc ina giada laschà eleger sco president per ils proxims trais onns
Per mai eri impurtant ch'i giaja vinavant bain cun il vischinadi ed jau na vuleva betg ch'il chantun vegn sch'ins n'ha betg in president e tut quels problems – perquai hai jau decidì ensemen cun mia famiglia da cuntinuar.
Tuttina sco en la Muntogna da Schons èsi era ì ad Alvra. Suenter l'evacuaziun dal vitg da Brinzauls ed in temp intensiv vuleva il president communal terminar il presidi sin la fin da l'onn 2024
Sch'ins senta ch'i na va betg pli d'ademplir il pensum cun il temp ch'ins ha ha disposiziun, lura han ins era la responsabladad fa far plaz ad ina successiun.
Il pensum da lavur e la bova da Brinzauls han procurà era en la vischnanca d'Alvra ch'i n'ha dà naginas candidaturas per il presidi communal.
Cumbats electorals
Cumbats electorals èn plitost enconuschents en lieus pli gronds dal chantun. Uschia datti a Cuira adina in cumbat per quel post. In factur è era la buna indemnisaziun dal president da la chapitala Grischuna
Cumbats electorals datti dentant era en lieus nua che la populaziun n'è betg cuntenta cun la situaziun actuala sco per exempel en la Val Müstair u a Tusaun.
Cuntent sch'i dat in candidat u ina candidata
En bleras vischnancas è la populaziun leda sch'i dat almain ina candidatura per il presidi. Lura è l'elecziun il pli ina chaussa formala.
Esser president communal è ina sfida
L'uffizi da president communal è collià cun blera responsabladad e cun pauca onur. Savens èsi da prender decisiuns che na plaschan betg a tuts. Lura èsi pussaivel ch'il president senta las consequenzas er en la vita privata. Latiers vegn ch'il respect envers l'uffizi manca magari.
Quai sa ir uschè lunsch ch'il president bitta nà tut perquai ch'el n'è betg pli pront da supportar quella situaziun. L'ultima giada è quai capità a Tumein.