Ils resultats federals eran gia dumbrads en tut ils chantuns enfin che la communicaziun da la vischnanca da Tusaun è arrivada cun ils resultats da las elecziuns communalas. Uss èsi dentant cler ch'i dat ina midada a la testa da la vischnanca ed uschia ina schleppa per il president en uffizi Curdin Capaul (Partida liberaldemocratica). El sto far plaz al cuntercandidat Ivo Rohrer (Partida verdliberala).
- Ivo Rohrer, 511 vuschs
- Curdin Capaul, 269 vuschs
- singuls, 27 vuschs
E malgrà ch'igl è ì ditg fin ch'ils resultats eran qua, sa legra Ivo Rohrer fitg da surpigliar questa nova sfida.
Il pli absolut tar las elecziuns da president è stà tar 404 vuschs. Gia avant trais onns tar las ultimas elecziuns da presidi a Tusaun avevi dà il duel Curdin Capaul cunter Ivo Rohrer. Lezza giada dentant cun la megliera fin per Curdin Capaul.
Ivo Rohrer vul meglierar las finanzas senza ch'ils burgais ston patir
Ivo Rohrer è stà ils davos trais onns commember da la cumissiun da gestiun. Quai haja dà ad el ina vasta invista en ils affars da la vischnanca, ha el ditg en il cumbat d'elecziun. Pertutgant las finanzas vesa el grond potenzial per l’avegnir. I saja da reponderar las expensas da la vischnanca, en il grond, sco era en il pitschen. I possia per exempel betg esser che las uras da parcar vegnian simplamain cuvertas durant ina festa a Tusaun. Tenor el saja quai sbaglià, i saja plitost impurtant da rinforzar il traffic public. Metter en urden las finanzas senza che la populaziun stoppia patir, quai saja ina da sias finamiras, sch’el vegniss elegì sco president communal.
La populaziun vul ina midada
Capaul leva anc far in'ulteriura perioda
Sco quai che Curdin Capaul aveva ditg avant l'elecziun, avess el gugent cuntinuà la proxima legislatura e manà vinavant projects lantschads. Tranter auter fiss quai stà la sanaziun da finanzas, la revisiun da la planisaziun locala che stoppia vegnir introducida, e la constituziun communala che stoppia vegnir revedida. Era il svilup da la staziun da Tusaun sco era da la Neudorfstrasse, sajan projects ch’el ha lantschà ed avess gugent manà ad ina finiziun. El aveva er ditg en vista a las elecziun ch'i saja conscient ad el ch'el n’haja betg mo amis en vischnanca. Ma quai saja era normal, surtut cura ch’ins haja da prender decisiuns nunpopularas.
Cussegl communal: cumbat per ils sis sezs
Sper il presidi ha Tusaun er elegì il cussegl communal. Per ils en tut sis sezs han cadidà set persunas. Prender plaz en il cussegl communal pon:
- Werner Elmer, 585 vuschs (senza partida)
- Veselin Stjepanovic, 534 vuschs (AdC)
- René Frauenfelder, 488 vuschs (AdC)
- Marlene Hürlimann, 473 vuschs (senza partida)
- Leo E. Bassy, 471 vuschs (senza partida)
- René Stutz, 464 vuschs (senza partida)
Betg tanschì per ina reelecziun hai per Werner Casutt (senza partida). El ha fatg 380 vuschs. Vuschs a singuls hai dà en tut 114.
Sco che la chanzlia da Tusaun ha ditg a RTR saja l'auta participaziun il motiv ch'igl haja cuzzà uschè ditg da dumbrar las vuschs. Tenor la glista da las elecziuns resulta ina summa da passa 17'000 vuschs ch'èn stadas da dumbrar la dumengia a Tusaun.
