Sis persunas han quest onn candidà per la suprastanza da Cuira. Tranter auter era Patrik Degiacomi e Sandra Maissen che han gia fatg part da la suprastanza. La dumengia dals 9 da zercladur curt suenter las tschintg la saira ha la chanzlia da la citad prelegì ils resultats:
| Patrik Degiacomi | 5'101 vuschs |
| Simon Gredig | 4'739 vuschs |
| Mans Martin Meuli | 4'115 vuschs |
Betg vegnì prelegì è il num da Sandra Maissen da l'Allianza dal Center. Ella n'è betg vegnida reelegida cunquai ch’ella ha fatg cleramain memia paucas vuschs. 2'751 han dà la vusch ad ella, quai è passa 1'000 vuschs sut la maioritad absoluta.
Ina surpraisa u s’ha quai schon mussà?
Tschintg dis avant las elecziuns ha la cumissiun da gestiun publitgà in rapport davart l’atmosfera en la suprastanza da Cuira, quella saja nauscha ed i dettia disfidanza. La cumissiun è vegnida a la conclusiun che las proceduras da duas fatschentas en il departament da la cussegliera da la citad Sandra Maissen na sajan betg idas tenor las prescripziuns. Che quest rapport vegn publitgà gnanc in’emna avant las elecziuns saja per cas, ha ditg il president da la cumissiun da gestiun Jürg Kappeler.
Sche quest rapport haja gì in’influenza sin las elecziuns è grev da valitar. La partida da Sandra Maissen, il Center Grischun, vesa quai per part uschia. Da quest avis è era Sandra Maissen sezza. Quai di ella en in’intervista envers RTR intgins dis suenter las elecziuns. La dumengia saira na vuleva ella betg prender posiziun, trais dis pli tard ha ella dentant discurrì da ses patratgs.
Jau stoss dir che la dischillusiun è anc qua. (...) Natiralmain ins sto far quint cun tut tar elecziuns. Dentant avev jau fatg quint cun ina reelecziun, sch'jau guard sin tut quai ch’è gartagià en mes ultims trais onns en uffizi.
Ella ha dentant acceptà sia sconfitta ed aveva en senn da lavurar vinavant enfin la fin da ses temp d’uffizi enfin la fin da l’onn. Mez avust è dentant vegnida la communicaziun che Sandra Maissen haja gì in culp. Durant sia absenza han il president da la citad Urs Marti ed il cusseglier da la citad Patrik Degiacomi surpiglià las incumbensas dal departament. Suenter dus mais absenza è ella vegnida enavos cun 50%. A partir da mez november haja Sandra Maissen puspè lavurà a temp cumplain. Quai enfin la fin da l’onn. Suenter surprenda la suprastanza elegida cun Patrik Degiacomi, Simon Gredig e Hans Martin Meuli.