Daniel Albertin resta president communal fin il 2026. Quai ha la vischnanca da Albula/Alvra communitgà gliendisdi, ils 4 da november. Schegea ch'ins haja tschertgà intensivamain in succerssur u ina successura per il presidi durant var trais mais, n'haja dà naginas candidaturas per l'uffizi – era betg suenter ch'il termin da pudair annunziar ina candidatura è vegnì spustà sin la fin d'october.
Igl è natiralmain puspè ina sfida da cuntinuar 2 onns. Ma cumanzar il schaner senza mastral n'è dal tuttafatg betg favuraivel per il cumin.
Daniel Albertin aveva ensasez annunzià il fenadur ch'el dettia giu ses uffizi sin la fin da l'onn. Pervia da la situaziun disfavuraivla saja el dentant sa mussà pront d'anc restar dus ulteriurs onns fin la fin 2026 en l'uffizi , scriva la vischnanca d'Albula/Alvra. L'um da 53 po guardar enavos sin ina lunga carriera politica: passa 20 onns è el gia stà activ en la funcziun da president communal – a l'entschatta sco president communal da la vischnanca Mon ed a partir dal 2015 lura sco emprim president communal da la vischnanca fusiunada Albula/Alvra.
Pensum da 80% duai far pli attractiv il presidi
Il pensum per l'uffizi sco president communal era fin qua tar 50%. Tenor Daniel Albertin saja dentant il plan da la vischnanca d'auzar il pensum sin 80%. La tschertga d'in successur u ina successura haja mussà ch'ils 50% na sajan betg in pensum ideal – cunzunt sch'ins veglia anc far dasperas in auter mastergn. Quai possia dar conflicts cun il cumin u cun l'auter patrun.
Nus sperain fitg che chattain ina persuna adattada sche nus adattain las structuras ed il pensum.
Pervia da sfidas sco la bova da Brinzaus dal 2023 saja tant pli difficil da vegnir a strada cun be 50%. Ins na sappia simplamain betg tge che capitia anc tut. Cun quest'adattaziun dal pensum sperian ins fitg da pudair chattar zatgi per la perioda a partir dal 2026. La pli impurtanta cumpetenza per in successur u ina successura saja tenor Daniel Albertin d'avair in'uregla averta per la glieud – cun gliez saja gia fatg in grond pass.
Or da l'archiv:
Cun la bova da Brinzauls dal 2023 eran Daniel Albertin e la suprastanza da la vischnanca d'Alvra confruntads cun ina situaziun extraordinaria. RTR ha rapportà:
