Marco Dolf è stà il 2021 l'emprim president da la vischnanca fusiunada. Avant è el stà president da Casti-Vargistagn. Ussa saja quai passa 20 onns ch’el haja surpiglià responsablada ed el saja vegnì tar la conclusiun che quai tanschi. Sper Dolf ha er demissiunà per la fin da l’onn il suprastant Marcel Cantieni, uschia che gist dus posts èn vacants. A la radunanza communala da venderdì saira n'è nagin sa mess a disposiziun per ina elecziun ed er la tschertga avant la radunanza n'ha purtà nagin success. Ussa saja da far in nov sforz per chattar persunas adattadas ed interessadas, uschia Dolf.
Nagin a la testa da la vischnanca n'è nagina opziun
Per Marco Dolf èsi cler: «Nagin president u nagina presidenta communala n'è nagina opziun». Per il december è ussa probablamain planisada ina radunanza communala per tuttina anc pudair preschentar insatgi. La tschertga cuntinuescha ed en mintga cas saja la populaziun sensibilisada ed intimada dad er far propostas, ha Dolf mess a cor. La speranza da chattar ussa insatgi a la radunanza saja bain stada qua, ma i saja er stà da quintar che nagin na sa mettia a disposiziun. La tschertga na sajan en mintga cas betg simpla, resumescha Marco Dolf. La speranza saja dentant qua ch'i gartegia da chattar insatgi.