Las elecziuns da la suprastanza da Cuira èn stadas elecziuns cun bleras emoziuns. La finfinala han Patrik Degiacomi (PS), Simon Gredig (La Verda Cuira) e Hans Martin Meuli (PLD) fatg la cursa. Davent da l'emprim da schaner 2025 furman els la suprastanza da la citad da Cuira.
Ma, per dus dad els vai dad in gia en il proxim cumbat electoral. I dovra numnadamain in segund scrutini per decider tgi che daventa nov president da la citad da Cuira. Degiacomi sco er Meuli han communitgà ch'els candideschian. Simon Gredig percunter desista d'ina candidatura e sustegn il candidat socialdemocratic, Patrik Degiacomi, sco quai ch'el ha communitgà envers RTR.
Jau m'allegrel da ruassar durant il segund scrutini.
Per il socialdemocrat ch'è dapi il 2017 suprastant, èsi adina stà cler ch'i vegnia a duvrar in segund scrutini per l'elecziun dal presidi. El saja pront per cuntinuar cun ses cumbat electoral. Pleds sumegliants datti er d'udir da Hans Martin Meuli. Ed el cumenza gia cun il cumbat cun dir ch'el haja in'avantatg ch'el pudess far 12 onns president da la citad, fertant che Patrik Degiacomi dastga mo presidiar la citad per quatter onns, pervia da la limitaziun d'uffizi. Per realisar projects e bajegiar si contacts fiss quai in avantatg. Quest argument na lascha Degiacomi dentant betg valair. El haja percunter gia l'experientscha en suprastanza ed enconuschia las sfidas, er entaifer la suprastanza ed en l'administraziun.
Partidas burgaisas sustegnan Hans Martin Meuli
Las partidas burgaisas da Cuira sustegnan il novelegì suprastant e candidat Hans Martin Meuli (PLD) en il cumbat electoral per il presidi. Sco commember dal parlament da Cuira saja Meuli sa mussà sco intermediatur excellent, sias qualitads da manar e sias cumpetenzas en il sectur da finanzas sajan exact quai che Cuira dovria ussa, argumentescha la PLD Cuira en ina communicaziun. Tenor quella communicaziun sustegnan er l'Allianza dal Center e la PPS la candidatura da Meuli.
La Glista libra ed ils Verds speran sin Patrick Degiacomi
La Glista libra ed ils Verds han entant communitgà ch'els recumondian il socialdemocrat Patrick Degiacomi sco president da la citad. El fetschia politica pragmatica senz'avair en egl partidas e saja bun da schliar grevas sfidas politicas, hai num en la communicaziun.
Il cumbat electoral per l'elecziun dal nov president da Cuira è en mintga cas lantschà. Ils 30 da zercladur sa decida tgi che succeda al liberaldemocrat Urs Marti ch'è stà president da la citad da Cuira dapi il 2013.
