L'onn passà ha el gì da dar dumogn a la situaziun da la bova da Brinzauls ed a l'evacuaziun da la populaziun. Tras quai è el stà bler en las medias.
Daniel Albertin raquinta da las sfidas da manar ina vischnanca cun ina fracziun en la zona da privel. E quai cun in pensum da lavur da 50%, sper aviar sez in manaschi puril. Era tge ch'è sa midà en tut quels onns en la politica communala declera el. A l'ur da la radunanza communala d'Alvra, ha Daniel Albertin dà in'intervista ad RTR.
Vus avais annunzià l'entschatta fanadur che Vus dais giu l’uffizi. Daco gist ussa?
Ins ha natiralmain bain fatg sias ponderaziuns, cura dar giu l'uffizi. Teoreticamain avess ins anc la pussaivladad da far dus onns da mastral. Nus avain era nagina legitimaziun ch'ins avess da chalar suenter 12 u 8 onns. Nus avain uss instruì blers projects e jau avess da manar il noss cumin cun 50%, e cun la sfida da Brinzauls n’è quai simplamain betg pussaivel. Jau crai ch’ins ha ina tscherta responsabladad, sch’ins s’accorscha, quai na va betg pli cun quel pensum, uschia ch'ins ha da metter a disposiziun e far plaz ad ina successiun.
L’onn passà ha il «rutsch» da Brinzauls e la situaziun intscherta dumandà ina massa da Vus. Tge fastizs ha quai temp laschà enavos?
Gea, d'ina vart han ins natiralmain emprendì fitg bler, ma igl è stà fitg fitg intensiv quest entir onn ed ins fa lura bain sias ponderaziuns, era per il cas ch'i dess anc ina giada la medema situaziun. Ins duvrass anc ina giada la medema forza ed er il medem sustegn da la populaziun. Jau na vuless betg anc ina giada vegnir en questa situaziun, qua na fatsch jau nagin misteri ordlonder.
Dastg'ins era dir che quai ha dà in stausch da chalar?
Jau vuless gnanc dir, ma igl ha era dà in segn da responsabladad. Sch'jau n'avess betg gì organisà quai uschè bain a chasa, cun collavuraturs, cun la dunna, cun la famiglia, cun las mattas, sche fiss quai stà ina sfida betg pussaivla da dumagnar. Perquai en quellas situaziun èn ins natiralmain dumandà betg mo 100%, mabain anc bler dapli. E lura han ins natiralmain in manaschi dasperas che vess era da funcziunar.
Tge è ì bain en quest temp e tge pli pauc?
Nus pudain dir: en general èsi ì bain, pertge nus essan era stads fitg bain preparads, saja quai dal chantun anora u da l’uffizi da militar e protecziun civila anora, nus avain gì fitg bunas preparativas. Tge che n'ha betg funcziunà uschè bain è anc grev da dir. Nus avain il plan ussa da far in'enquista per guardar co che la populaziun ha sentì l'evacuaziun. Tge è da lur vista anora stà bun e tge betg uschè. Igl è grev da giuditgar sco testa da quell'entira organisaziun tge che n'è betg ì uschè bain. En general pudain dir: igl è gartegià.
Vus essas gea stà president da la pitschna vischnanca da Mon e davent dal 2015 lura il president da la vischnanca fusiunada d’Alvra. Tge autras experientschas u sfidas han tenor Vus marcà il pli fitg quels passa 20 onns sco president communal?
L'administraziun è natiralmain creschida ils davos onns exponenzialmain. Tuts vulan pli pauca administraziun, ma tuttina tuts che pretendan dapli da l’administraziun. E quai ch’ins ha natiralmain era s’accorschia, ins tschertga en sasez adina culpants. Insatgi sto adina esser la culpa, sch’insatge na gartegia betg. Pia en sasez essan, co duess jau dir, in zic manads da nossas segiradas. Jau crai quai ha prendì tiers fitg. Igl è era grev da prender tschertas decisiuns, pertge ch'ins pensa alura: sch’i va bain, sch'èsi bun, sch'i na va betg bain, alura es ti stà.
Tge èn uschia las pli impurtantas lecziuns che Vus avais prendì sco president da quellas duas vischnancas?
Jau crai, ch'jau haja il dun da tadlar tiers. Ins ha da tadlar tiers adina puspè, per exempel als differents vischins e las vischinas. Il davos han tuts raschun, ma betg adina dal medem temp.
Vus stais en l'uffizi enfin la fin da l’onn. Tge vegn anc a fatschentar Vus enfin lura?
Nus avain bain anc in pèr projects ed il davos vegnia er anc a restar al cumin, forsa er al mastral dal cumin, d’empruvar da chattar ina successiun. Quai na vegn forsa tuttina betg ad esser uschè simpel. Ma forsa mo jau che crai quai, ins vegn lura a guardar cura che nus savain far quellas elecziuns.
E tge faschais cura che Vus avais lura dà giu l’uffizi?
Sch'jau savess gia quai, lura schess'jau, ma jau na sai anc betg. Jau fatsch franc il pur, dentant vegni er ad esser grev da betg pli far politica. Ma nus stuain guardar.
Sche nus discurrin da politica suenter passa 30 onns en la suprastanza communala e passa 20 onns da quels sco president: tge vegn a mancar a Vus da la politica?
Ins ha natiralmain fitg fitg buns lioms enfin tar la regenza, enfin tar ils differents uffizis, cun la populaziun. Jau savess bain ma metter avant che quai vegn forsa in pau curius, sch'jau na vegn betg pli dumandà, ils 2 da schaner.
