I spetgan gia differentas occurrenzas grondas futuras sco per exempel cursas da la cuppa mundiala l'entschatta 2028 ed il favrer 2030. Per survegnir la licenza A da l'uniun mundiala da biatlon dovria la surfatscha dal parcadi da catram tar l'arena da biatlon, di Walter Reusser, il CEO Sport da Swiss-Ski. Durant la stagiun vegnia quel nizzegià fermamain – la surfatscha saja dentant savens era vida.
Il parcadi tar l'arena da biatlon e adattà perfetgamain per nizzegiar meglier la surfatscha cun ina garascha da parcar sutterrana e bajetgs stabels sin la surfatscha.
Schebain che l'organisaziun mundiala haja quasi sfurzà da construir bajetgs stabels a l'arena da biatlon per ils campiunadis mundials da l'enviern passà sajan ins conscientamain restà tar la varianta mobila, di Walter Reusser. Las preparativas per il campiunadi mundial da biatlon saja stà il test da stress per far experientschas e guardar tge ch’i dovria insumma, sco la logistica possia funcziunar e tge che manchia anc.
Visiun
Sin basa da quellas experientschas hajan ins fatg workshops cun differents exponents sco per exempel la vischnanca u ils utilisaders da l'arena. Ensemen cun in investur veglian ins uss sviluppar la visiun futura. Per la finanziaziun na fa Swiss-Skis nagins quitads, differents investurs hajan gia mussà interess.
Actualmain sa tracti dad ina visiun ed anc betg dad in project concret elavurà.
Era da vart la vischnanca saja il basegn da sviluppar vinavant l'arena da biatlon cleramain avant maun, di il president communal da Lantsch Simon Willi. Cun la visiun futura hajan ins la speranza da pudair sviluppar in project persistent per in diever sur onn da l'arena da biatlon che porta er insatge a la vischnanca.
2006:
L’iniziant indigen Ursin Fravi lantscha ensemen cun Leo Baselgia e Simon Willli l’idea per in implant da far biatlon.
2007:
Avrigl: Radunanza communala decida credit d’impegn da radund 5,6 milliuns francs per bajegiar la Arena da biatlon Lai.
2013:
- Avrigl: Emprima badigliada per realisar l’arena da biatlon sur Lantsch
- December: Las emprimas concurrenzas han gì lieu en la nova arena
2015:
October: Vischnanca sa decida per l’investider Michael Hartweg sco partenari, e quai lubescha da realisar tranter auter il Nordic House
2017:
- Avust: L’Arena da biatlon survegn da la IBU (Federaziun internaziunala da biatlon) la licenza per organisar concurrenzas da la cuppa mundiala e campiunadis mundials.
- December: Emprimas cursas internaziunalas da biatlon (cuppa IBU)
2020:
Schaner: 500 atletas ed atlets als campiunadis mundials dals juniors e giuvenils
2021:
Settember: Emprima badigliada per la pista d’ir cun skis cun rodas. Quella vegn prolungada sin 4 kilometers, suenter che organisaziuns d’ambient han refusà in traject pli lung.
2022:
Matg: L’investider Michael Hartweg venda l'Arena da biatlon Lai SA a Swiss Ski
2023:
- Schaner: il Campiunadi europeic ha lieu ils 25 fin 29 da schaner
- December: han lieu per l'emprima giada cursas da la cuppa mundiala
2025:
Favrer: Campiunadi mundial cun ils megliers e las meglras biatletas dal mund
Bleras dumondas avertas
Sco proxim pass saja uss dad adattar il plan da l'areal ed elavurar in contract da dretg da construcziun – per ch'ins possia alura entschaiver cun il project preparativ. Da vart da la vischnanca datti differentas premissas per la visiun futura da l'arena da biatlon.
Il nov project sto avair in ferm connex cun l'arena da biatlon, quai è la premissa la pli impurtanta da vart da la vischnanca.
Vinavant stoppia dar parcadis publics en la dimensiun actuala – quai saja la premissa per survegnir vinavant la lizenza A da l'organisaziun mundiala da biatlon. En cuntrari a Swiss-Ski vesa il president communal Simon Willi era la finanziaziun dad in project futur sco sfida. Era dumondas criticas da la populaziun n'excluda il president communal betg. Las schanzas che la visiun futura per l'arena da biatlon a lantsch possia daventar realitad vesa Simon Willi actualmain tar 50:50.
La visiun concreta vegn uss elavurada dad ina fatschenta indigena. La populaziun vegn integrada en il process cun ina procedura da participaziun ed infurmada successivamain. L'ultim pled en chaussa han numnadamain ils da Lantsch. Gia questa stad duess ins pudair preschentar in preproject per il svilup futur da l'arena da biatlon a Lantsch.
Or da l'archiv:
Baselgia e Bergamin – els èn il power indigen en il comité d’organisaziun dal campiunadis mundials da biatlon a Lantsch.