En duas emnas spetga a Lai il punct culminant da la stagiun da biatlon. Per biatletas e biatlets svizzers vegn il campiunadi mundial da chasa ina chaussa fitg speziala. E bain pussibel ch’i pudess era dar ina u l’autra medaglia per ils Svizzers. La furma constat numnadamain. Cunzunt Niklas Hartweg ed Amy Baserga han procurà il davos temp per resultats constants sut ils top 10. Ma era las soras Aita ed Elisa Gasparin han persvadì cun buns resultats.
Uss vali da restar saun
Suenter intgins dis a chasa turna l’equipa svizra da biatlon anc ina giada enavos ad Antholz nua ch’igl è vegnì manà atras las davosas cursas da la cuppa mundiala. Ad Antholz duai anc vegnir trenà ina giada intensiv en vista al campiunadi mundial da chasa. I vegn lavurà vi dals davos detagls, mintgin individual. La raschun per quest return en il Tirol dal Sid: Là po vegnir trenà en l’autezza, Antholz schai sin 1'600 meters sur mar ed è uschia bun 200 meters pli ad aut che Lai. Plinavant pon ils Svizzers trenar là en tut ruaus damai ch’i fiss strusch stà pussibel da sa preparar optimal a Lai nua ch’ins è anc vi da las davosas lavurs da construcziun per quest campiunadi mundial. La gronda finamira saja però che tut las atletas ed ils atlets restian sauns, uschia Lukas Keel, il schef biatlon tar Swiss Ski.