Oz è il suveran svizzer puspè clamà a l'urna. Votaziuns chantunalas na datti questa giada naginas en il Grischun. I dat dentant trais votaziuns federalas e numerusas votaziuns ed elecziuns communalas.
RTR tegna sin il current davart decisiuns communalas e las trais votaziuns federalas:
- Sin www.rtr.ch chattais tut ils resultats, graficas ed analisas
- Decisiuns impurtantas porscha era social media cun #votaziuns
- Las novitads al radio rapportan mintg'ura dal pli actual
- Reacziuns ed analisas pudais tadlar en emissiuns spezialas al radio las 12:00 – 12:30 e las 16:00 – 18:00
- Il Telesguard resumescha las decisiuns a las 17:40 sin SRF 1
Nova constituziun, ina punt pendenta e la lescha da chamonas
En 17 vischnancas grischunas vegn votà u elegì oz. RTR porscha ina survista:
- Ils da Glion duain decider davart la revisiun totala da la constituziun communala .
- A Mustér vegn votà davart in credit d'in mez milliun francs per ina punt pendenta tranter Mustér e Mumpé Medel.
- Il suveran da Zernez decida davart ina nova lescha davart chamonas communalas .
- A Panaduz cumbattan Rico Caratsch e Marcel Bieler per il presidi communal .
- A Mesocco duai vegnir decidì sche la San Bernardino Swiss Alps SA po acquistar il terren necessari per construir in center d'hotel e da wellness. Tar in Gea vegniss er il territori da skis reavert.
La survista da tut las votaziuns ed elecziuns communalas en il Grischun:
Clima, Covid e taglia
Sin nivel federal datti trais votaziuns:
Tar la Lescha davart la protecziun dal clima vai per mesiras per cuntanscher la neutralitad al clima fin il 2050. Tranter auter cun sustegns finanzials per midar ils stgaudaments per proprietaris da chasas.
Tar la tariffa da taglia minimala per concerns gronds internaziunals vai per l'implementaziun da la taglia minimala internaziunala en Svizra. Il 2021 han l'OECD ed ils G20 decidì d'introducir ina taglia minimala internaziunala per concerns gronds da 15%.
La Lescha Covid-19 vegn gia per la terza giada davant il suveran svizzer. Questa giada vai per la prolungaziun da tschertas mesiras cunter la pandemia fin il 2024. Cunter questa decisiun dal parlament è vegnì rimnà il referendum, ussa decida puspè il suveran.
Clima er in tema en differents chantuns
En il Grischun na datti questa giada naginas votaziuns chantunalas. En auters chantuns è il clima dentant er in tema sin il nivel chantunal. Uschia decidan ils da Vad davart integrar la protecziun dal clima en la constituziun chantunala. En l'Argovia datti sper la votaziun naziunala er anc ina votaziun davart ina lescha chantunala davart la protecziun dal clima, quella pretenda tranter auter er meglra isolaziun per chasas.
E la Turgovia decida davart abolir il cunfin maximal da 22 milliuns francs l'onn per il fond dal clima. Quel vegn duvrà per subvenziunar mesiras per spargnar energia u per generar energia renovabla tar novs bajetgs u renovaziuns