Il suveran svizzer decida ils 18 da zercladur davart l'adattaziun da la Lescha Covid-19, ch'il parlament ha approvà ils 16 da december 2022. Tras questa adattaziun èn tschertas mesiras cunter la pandemia vegnidas prolungadas fin il 2024. Cunter questa decisiun è vegnì prendì il referendum. Uschia decida la populaziun svizra per la terza giada davart la lescha Covid-19.
Arguments per e cunter
Per ils aderents da la lescha è quella stada impurtanta per limitar la pandemia e mitigiar sias consequenzas. En cas d'urgenza vulan els pudair revegnir als instruments cumprovads.
Per il comité ch'ha rimnà suttascripziuns per il referendum n'èn las restricziuns betg sa cumprovadas e n'hajan betg purschì la protecziun empermessa a la populaziun. Las mesiras hajan chaschunà bler suffrientscha.
Recumandaziuns
Il Cussegl federal ed il parlament recumondan d’acceptar la midada da la Lescha Covid-19. En il Cussegl naziunal èn 140 commembers e commembras stads per, e 50 cunter. En il Cussegl dals chantuns è la fatschenta vegnida acceptada cun 39 cunter ina vusch.
