Elecziun presidi a Panaduz - Ramurs a l'ur dal cumbat electoral

Tuts dus candidats per il presidi da Panaduz èn actualmain en suprastanza communala. Rico Caratsch da l'Allianza dal Center e Marcel Bieler, candidat liber cumbattan per il sez a la testa da la vischnanca.

Tgi èn ils dus candidats?

Rico Caratsch è oriund da la Val Müstair e viva dapi 19 onns a Panaduz. En suprastanza communala è el responsabel per il ressort segirtad e sanadad. El lavura tar la Polizia chantunala grischuna. Ses cuntercandidat Marcel Bieler è creschì si en il vitg. En suprastanza è el responsabel per il ressort furmaziun, cultura e sport. El maina actualmain ina cassa da malsauns.

In cun, tschel senza partida

Sco commember da l'Allianza dal Center ha Rico Caratsch sustegn d'ina partida, quai che saja en mintga cas in avantatg durant il cumbat electoral. Sia motivaziun da candidar per il presidi da Panaduz saja en emprima lingia il plaschair e l'entusiassem per la politica en general. Gia sco giuven saja el stà fascinà da la politica. Lavurar en l'executiva fetschia grond plaschair, saja interessant e fitg vast.

Il candidat Marcel Bieler è senza partida, el na vesa quai dentant insumma betg sco dischavantatg. Auter ch'in candidat ch'è commember d'ina partida saja el fitg liber en sias decisiuns e betg lià ad ina partida. Las experientschas ch'el haja fatg en suprastanza communala hajan motivà el da candidar, plinavant haja el percurschì che la politica fetschia plaschair ad el. Cun quai ch'el è creschì si a Panaduz hajan blers dal vitg fatg curaschi da candidar. L'AdC saja dapi onns fitg dominanta en il vitg, uschia ch'igl è tenor Bieler temp ch'insatgi senza partida u d'in autra partida surpeglia il timun.

Ramurs a l'ur dal cumbat electoral

Durant il cumbat electoral vegni savens fatg reclama per il candidat u la candidata preferida en furma da brevs da lecturs. Quai è nagut spezial. Fatg surstar in zic ha dentant l'entschatta matg ina brev da lectur publitgada en la Südostschweiz. La brev da «reclama» a favur da Rico Caratsch era numnadamain suttascritta da la presidenta communala actuala da Panaduz, Elita Florin-Caluori da l'Allianza dal Center. Reagì sin questa brev aveva Silvia Foppa da Panaduz, quai medemamain cun ina brev da lectur. I saja curius che la presidenta en uffizi fetschia reclama per ses successur. Ins sa dumondia pertge ch'ella fetschia quai e sche qua saja onest? Sin dumonda da RTR di la presidenta communala actuala Elita Florin-Caluori, ch'ella haja scrit la brev sco persuna privata e betg en sia funcziun actuala.

Ils dus candidats na vesan la brev da lectur da la presidenta actuala betg sco dispitaivla. Er ils dumandads e las dumandadas suenter la radunanza communala da mardi saira na vesan quai betg sco problematic, e quai independentamain a tgi ch'els dattan la fin finala la vusch.