Glion
L'iniziativa per ina revisiun totala da la constituziun è vegnida approvada cun 61,2% da las vuschs, la cuntraproposta fitg cnap cun 50,3%.
Uschia ha la dumonda da tagl stuì decider, e qua è il votum stà cler cun 56,8% da las vuschs per l'iniziativa.
Plinavant è Michal Hohl vegnida elegida en la suprastanza communala. Ella succeda ad Alice Bertogg-Darms, ch'ha demissiunà. La candidata socialdemocratica ha fatg 529 vuschs, tar in pli absolut da 348. Vitiers hai dà 165 vuschs singulas, 183 cedels vits e 112 cedels nunvalaivels.
Mesocco
En la vischnanca da Mesocco è vegnì decidì che la San Bernardino Swiss Alps SA po acquistar il terren necessari per construir in center d'hotel e da wellness en la zona Acufòrta. Quai cun 351 vuschs Gea e 96 vuschs Na.
La participaziun da vuschar è stada tar 48,5%. En ina emprima etappa èn planisadas investiziun da var 60 fin 70 milliuns francs.
Cun acquistar il terren è la San Bernardino Swiss Alps SA obligada da procurar per la reavertura dals implants da skis da Confin e da renovar en il center dal vitg da San Bernardino sis ulteriurs edifizis istorics cun caracter d'hotel. Il territori da skis è serrà dapi il 2012. En total prevesa il milliunari tessinais Stefano Artioli d'investir var 300 milliuns francs per tut quests intents.
Mustér
Il suveran da Mustér ha decis cun in Na davart in credit da 390'000 francs per ina punt pendenta tranter Mustér e Mumpé Medel. Suenter ch'il parlament communal ha approvà il credit, è vegnì inoltrà in referendum. La fatschenta è vegnida refusada cun 537 vuschs Na e 448 vuschs Gea.
Panaduz
Il suveran ha elegì Marcel Bieler sco nov president communal. El daventa uschia successur da la presidenta communala d’enfin uss, Elita Florin-Caluori, ch'ha demissiunà.
Marcel Bieler ha fatg 921 vuschs. Ses concurrent Rico Caratsch 404 vuschs. La participaziun è stada tar 55,9%.
Ils da Panaduz han era elegì ina nova suprastanza. Part a questa fan Nicole Sutter-Riedi, Martin Gieriet, Tobias Marty e Stefan Herger.
Zernez
A Zernez ha il suveran approvà cun 312 vuschs Gea e 83 vuschs Na la revisiun da la lescha communala da chamonas. I va surtut per la dumonda tgi ch'ha il dretg da s'annunziar per prender a fit chamonas communalas.
Surses
Set onns suenter la fusiun da las otg vischnancas dal Surses ha il suveran approvà la revisiun parziala da la constituziun communala. Quai cun 295 vuschs Gea, tar 109 Na. La participaziun a la votaziun è stada tar 22,06%.
Nov è:
- Il dretg da referendum: davart decisiuns da la radunanza communala sto vegnir votà a l’urna sche 80 persunas prendan il referendum facultativ.
- La suprastanza communala è obligada d’organisar radunanzas d’orientaziun davart projects u fatschentas spezialas sche 50 votants e votantas pretendan quai en scrit.
- Schlargiament da la cumpetenzas da la cumissiun da bajegiar: la cumissiun po decider sezza davart dumondas da bajegiar sche la decisiun è unanima.
- Il president communal u la presidenta communala n’è betg pli obligada da surpigliar il presidi da la direcziun communala. Er in commember u ina commembra po en avegnir occupar quest post.
Arosa
Il suveran d'Arosa ha approvà la revisiun parziala da la constituziun communala cun 606 vuschs Gea e 213 vuschs Na. Per gronda part vai per midaments en l'administraziun communala. En pli vegn reducì il temp per rimnar suttascripziuns per in referendum facultativ da 90 sin 30 dis. Ils 30 dis èn plitost la norma tar las vischnancas grischunas.
Breil
A Breil è vegnì elegì Ramon Schmed sco nov commember da la suprastanza communala. Quai cun 225 vuschs. Maria Luisa Middea sa retira da la suprastanza communala sin la fin da zercladur per motivs famigliars e persunals.
Bregaglia
Il suveran da la Bregaglia ha decis davart la revisiun parziala da la constituziun. La fatschenta è approvada cun 375 vuschs Gea encunter 92 vuschs Na.
Per l'ina vegn la constituziun adattada las midadas da dretg chantunal e federal, per l'autra vegn stgaffì ina lescha davart l'organisaziun da la vischnanca. Plinavant datti da nov in referendum facultativ e la vischnanca è obligada da far occurenzas d'infurmaziun per la populaziun davart temas actuals. Questas pon era vegnir pretendidas da 20 votants u votantas da la Bregaglia. Era vegn la suprastanza communala reducida da set sin tschintg commembers.
Cazas
La presidenta communala da Cazas Pascale Steiner è vegnida reelegida cleramain en uffizi. Ella ha survegnì 404 vuschs, tar 464 cedels dads giu. Singuls han survegnì 20 vuschs.
Da nov part da la suprastanza communala fan Manuela Carrocia-Krüsi e Jakob Martin. Reelegì han ils votants e las votantas da Cazas Barbara Caflisch e Patrik Gasser.
Favugn
A Favugn è vegnì votà davart da trais fatschentas:
- La revisiun parziala da la lescha davart ils santeris e las sepulturas è vegnida approvada cun 643 vuschs Gea cunter 58 vuschs Na.
- Cun 579 vuschs Gea cunter 175 vuschs Na di il suveran da Favugn Gea a la revisiun parziala da la lescha da polizia. En avegnir datti in'obligaziun da corda per chauns en il territori abità.
- Era il rapport ed il quint annual 2022 èn vegnids approvads cun 681 vuschs Gea e 31 vuschs Na.
Flem
Cun 657 vuschs di Flem Gea a la revisiun da la planisaziun locala sin il territori Prau Pulté. Quella è necessaria per construir in'ovra termoelectrica da laina a Prau Pultè. En il futur po l'ovra stgaudar parts da Flem e da Laax cun ina rait da chalur a distanza. 45,4% da votants e votantas èn sa participadas.
Lantsch
Ils e las da Lantsch han decis davart dus credits pli gronds.
- Il credit d'obligaziun da 1'700'000 francs per la sanaziun da la via e da l'aual La Fola è vegnì approvà dal suveran cun 103 vuschs Gea e 87 vuschs Na.
- Era il credit d'obligaziun da 810'000 francs per ils campiunadis mundials IBU da biatlon il 2025 è vegnì approvà. Quai cun 124 vuschs Gea e 68 vuschs Na.
S-chanf
Ils S-chanfigners e las S-chanfignras èn stads a l'urna per votar davart la revisiun parziala da la constituziun communala. Questa è vegnida approvada cun 77 vuschs Gea e 21 vuschs Na. En la revisiun vai per introducir ina cumissiun da gestiun ed abolir l’uffizi dal commember substitut da la suprastanza communala.
La segunda fatschenta, l'introducziun dal princip da transparenza per la vischnanca, è vegnida acceptada cun 88 vuschs Gea e 11 vuschs Na.
Samignun
Tar las elecziuns per il presidi communal per il rest da la perioda d'uffizi enfin la fin dal 2024, n'ha nagin candidat cuntanschì il pli absolut da 107 vuschs. Las pli bleras vuschs han fatg Daniel Schindler cun 74 e Daniel Högger cun 71. Cun quai datti in segund scrutini.
Plinavant ha il suveran da Samignun approvà trais fatschentas
- Il register funsil da Samignun vegn integrà en il register funsil da l'Engiadina Bassa/Val Müstair. Quai han ils da Samignun decis cun 72% da las vuschs.
- Products da stgaudar tubac senza brischar quel vegnan da nov integrads en il contingent da cigarettas da la zona libra da dazi Samignun. 75% han votà per quest project.
- La lescha da la taxaziun dal commerzi vegn er adattada, quai pervi da la midada da la taglia sin plivalur per la finanziaziun da l'AVS. Ils Samignechels e las Samigneclas han approvà quest midament cun 73% da las vuschs.
Vaz
A Vaz è il credit d'impegn da maximalmain 1'000'000 francs per la finanziaziun dals Campiunadis mundials da biatlon da la IBU 2025 a Lai vegnì approvà cun 490 vuschs Gea cunter 339 vuschs Na.