Votaziun 18 da zercladur - La punt pendenta da Mustér dat da discutar

Per ils iniziants da la punt pendenta è la via sur il referendum in process democratic che vala da respectar. Els sajan fitg cuntents da sentir in grond sustegn or da la populaziun ed era da las instituziuns politicas communalas, di Christian Loretz. Quai motiveschia fitg da cuntinuar cun il project era sche quel na survegniss betg il credit communal. Ma lura na vegnissan els probabel betg da pussibilitar in access gratuit per tuts a la punt e quai fiss donn, uschia Loretz. La raschun daco ch’els hajan dumandà in credit da la vischnanca è ch’els hajan ils ultims onns ramassà blers daners da sponsurs e donaturs, ma els hajan stuì realisar che la finamira da finanziar tut cun sponsur na saja betg pussibel. Per pudair garantir l’access public hajan els dumandà tant il chantun sco era la vischnanca per in sustegn, uschia Christian Loretz, iniziant e president da l’uniun «La Pendenta».

La procedura è il problem e betg la punt

Per la gruppa da votantas e votants ch’han ramassa las suttascripziuns per il referendum n’è la punt betg il problem. Ins possia era anc far duas u trais punts, ma la finanziaziun e l’agir saja stà fallà, uschia Ignaz Furger, il pledader da la gruppa. Ins haja vulì decider sur ils chaus da las abitantas da la vischnanca e quai hajan els vulì evitar. La surdada d’in credit d’ina autezza totala da 480’000 francs saja quasi nizzegià dal tut las cumpetenzas dal cussegl communal, e sch’ins quintia anc ils custs dal mantegniment da la punt, alura surpassian quals il mez milliun e la fatschenta avessi uschè u uschia tutgà a l’urna, declera Ignaz Furger.

Perquai hajan els prendì quest referendum. En tut èn vegnidas inoltradas 129 suttascripziuns valaivlas, quai ha il president communal da Mustér René Epp confermà. Uschia vegn la decisiun da conceder in credit da 390’000 francs per il project «La Pendenta» ils 18 da zercladur a l’urna. Era vegn decis davart ina summa immediata a conto da 140’00 francs per pudair empustar il material necessari suenter che la lubientscha da bajegiar è concedida, uschia la formulaziun en il messadi per mauns dal parlament communal dals 18 d’avrigl. Era vegn decis davart il fatg che la vischnanca da Mustér vegn en futur ad esser responsabla per il mantegniment da la punt pendenta.

Parlament communal – cler per credit

L’uniun «La pendenta» ha lantschà il project per ina punt pendenta da Sontga Gada sur la chavorgia dal Rain a Mumpé Medel avant radund trais onns. Dapi lura è vegnida fatga blera lavur da persvasiun, tant tar la populaziun sco era tar las instituziuns. Surtut è stà da rimnar daners e quels èn per gronda part ramassads, han ils responsabels da l’uniun orientà a la sesida dal parlament communal. Quel ha suenter ina discussiun sur da l’autezza da la contribuziun approvà la dumonda cun 12 cunter 2 vuschs. Cun il credit da 90'000 francs gia concedì da l’uniun munta la cumpart da la vischnanca per la punt planisada a 480'000 francs. Quai èn radund in quart dals custs da la punt, uschia ils responsabels. Il chantun ha empermess in sustegn da 570'000 francs, quai che munta ina cumpart da radund 30% dals custs.

Finanziaziun sin buna via

La gronda part dals daners ha l’uniun pudì ramassar ils ultims mais. Uschia hajan per exempel 197 persunas cumprà per 1'000 francs in meter punt, quai saja dapli che spetgà, ha il president da l’uniun Christian Loretz ditg a la sesida dal parlament communal. En general hajan els sentì in grond sustegn era dals sponsurs. Cun la cumpart segirada da la vischnanca possian els uss dumandar per sustegn tar pliras fundaziuns, che fetschian dependent lur sustegn dad ina contribuziun communala. Perquai èn ils responsabels persvas da pudair anc recaltgar ils daners necessaris.

La vischnanca surpiglia il manaschi

Il manaschi da la punt futura vul la vischnanca da Mustér a far. Tenor ils responsabels custa quel radund 10'000 francs l'onn, ina summa che po dentant vegnir generada cun contribuziuns voluntaras. Surtut vegn quintà cun dapli giasts dal di che vegnan a guardar la punt pendenta la pli lunga dal Grischun e la quart pli lunga da la Svizra. Studis quintan che radund 20'000 giasts dal di vegnan a visitar la punt pendenta mintg'onn, scriva la vischnanca en il messadi.