L'iniziativa che pretenda ina revisiun totala da la constituziun communala è vegnida inoltrada il davos da matg 2022. En quella pretendan las 420 persunas ch'avevan suttascrit l'iniziativa, da preschentar a la populaziun variantas dal model politic – per exempel ina reintroducziun da la radunanza communala u in parlament communal pli pitschen. Era ina reintroducziun da departaments u la rolla da la direcziun communala saja tranter auter da prender sut la marella.
Proposta da suprastanza ha chaschunà discussiuns
La suprastanza communala ha proponì al parlament da laschar votar, en in emprim pass, la populaziun en general schebain ins vul ina midada da la constituziun u betg. Sch’i dess in Gea, vegniss en in segund pass elavurà la revisiun totala da la constituziun. Quella proposta ha procurà per gronda discussiun ed irritaziun. La presidenta dal parlament Gierina Gabriel è stada da l'opiniun, che la populaziun stoppia pudair votar davart il text ch’ils iniziants han inoltrà.
Suenter ina discussiun confusa cun propostas dretg e sanester ha il parlament la finala decidì da preschentar a la populaziun il text da l’iniziativa sco quai ch'el è vegnì inoltrà per laschar votar lasura.
Il parlament ha sez anc formulà ina cuntraproposta. Quella è pli averta e pretenda che la revisiun totala cumpiglia in giudicament da l'entira constituziun communala e na betg mo ils puncts che l'iniziativa pretenda. Sche tut va tenor plan vegn l'iniziativa il zercladur en votaziun a l’urna.
