La vischnanca politica e la vischnanca burgaisa da Mesocco èn sa cunvegnidas cun la San Bernardino Swiss Alps SA sin ils proxims pass dal project che duess purtar nov schlantsch al lieu. Ils 11 da matg vegn il cussegl communal da Mesocco a decider davart ina vendita da terren a San Bernardino en la valur da radund sis milliuns francs. Decidì definitiv vegn a l’urna ils 18 da zercladur.
Milliunari tessinais vul investir
Il milliunari tessinais Stefano Artioli vul purtar nova vita a San Barnardino. Il project San Bernardino Swiss Alps SA prevesa en l’emprima fasa d’embellir il center dal vitg cun reanimar ils hotels istorics Brocco & Posta e Ravizza. Plinavant duai dar novs hotels d’appartaments ed abitaziuns privatas ed i duess era dar in center da wellness public. Ordaifer il vitg duessan vegnir construids novs parcadis. Per stgaudar duess vegnir construida ina rait cun chalira a distanza.
Puspè ir cun skis a San Benardino
Sco che Niccolò Meroni, il pledader da la San Bernardino Swiss Alps SA, ha ditg envers RTR, saja ins sa cunvegnids cun la vischnanca politica e burgaisa, da reavrir il territori da skis Confin sin l’enviern 2024/25. Ins possia dentant betg excluder ch’il territori da skis possia gia avrir il proxim enviern, ma che quai capitia na possia ins dar nagina garanzia, uschia Meroni. Ins vegnia ad avrir cun ils runals, la sutgera e la pendiculara existenta. En il futur duessan ils implants dentant vegnir remplazzads entras novs.
