L'onn 2019 è vegnida inoltrada l'iniziativa federala dal pievel «Per in clima saun (Iniziativa da glatschers)» . Per il Cussegl federal e per il parlament è l'iniziativa stada memia extrema. Per quest motiv ha il parlament elavurà ina cuntraproposta indirecta: La Lescha davart la protecziun dal clima. Il comité ha silsuenter retratg l'iniziativa .
Cunquai ch'il referendum è reussì cunter questa cuntraposta, vegn il project davant il pievel.
La lescha duai fixar che la Svizra daventia fin il 2050 neutrala al clima. Quai vul dir ch'ella na dastga betg pli emetter dapli gas cun effect da serra che quai ch'ella è buna d'absorbar (en furma da guauds u meds tecnics). La nova lescha fixescha finamiras per reducir las emissiuns e duai garantir ch'ils meds finanzials vegnian investids a moda pli favuraivla al clima. Tut en tut stattan a disposiziun 3,2 milliardas francs per mesiras ed innovaziuns tecnicas. 2 milliardas francs entaifer diesch onns per persunas privatas ed 1, 2 milliardas francs entaifer sis onns per firmas. En cuntrast cun l'iniziativa na vul la cuntraproposta betg scumandar d'arder carburants fossils suenter il 2050.
Per e cunter
Per ils aderents daventan la populaziun e l'economia grazia a la lescha pli independentas d'imports d'ieli e da gas e la protecziun dal clima vegn rinforzada.
La Partida populara svizra ha lantschà in referendum e rimnà pli ch'il dubel da las 50'000 suttascripziuns necessarias per ch'i dettia ina votaziun. Per la PPS è la lescha in «maglia electricitad» e fa donn a l'economia e la populaziun.
Recumandaziuns
Il Cussegl federal ed il parlament recumondan in Gea a la lescha. Da las partidas è be la PPS cunter. Tut las autras partidas sustegnan la lescha.
