La realisaziun da la tariffa da taglia minimala per concerns gronds duai succeder en Svizra cun ina midada da la Constituziun federala. Il suveran votescha ils 18 da zercladur 2023 en chaussa.
L'Organisaziun da cooperaziun e svilup economic, OECD, ed ils 20 pajais industrials ed emergents ils pli impurtants G20 han decidì l'october 2021 d'adattar la taxaziun da gronds concerns internaziunals. Da nov duain quels pajar almain 15% taglia sin lur gudogns. Er la Svizra – ensemen cun radund 140 auters stadis – è sa participada a quest project. Actualmain è la taglia èn Svizra per part sut quests 15% minimals. Pertutgadas fissan interpresas cun ina svieuta da passa 750 milliuns euros.
Quai sa mida
Il Cussegl federal ed il parlament vulan midar la Constituziun federala per pussibilitar quest tractament egual. Il Cussegl federal sto entaifer da sis onns preschentar ina lescha federala per questas midadas. Fin là datti ina soluziun transitorica, da cuntanscher ils 15% taglia cun agid dad ina taglia supplementara. 75% da las entradas da questa taglia supplementara duessan ir als chantuns e 25% a la Confederaziun.
Pro e contra
Per ils aderents garantescha la midada cundiziuns generalas stabilas e segirescha entradas fiscalas sco er plazzas da lavur en Svizra.
Per ils adversaris è surtut la distribuziun da las entradas tras la taglia il punct da critica.
Recumandaziuns
Il Cussegl federal ed il parlament recumondan d'acceptar la midada da la Constituziun federala. Da las partidas grondas è vegì critica da sanestra, la PS è cunter ed ils Verds han decis la libertad da votar, tut las partidas burgaisas recumondan in Gea.
