La specialista da la cursa cunter l'ura Elena Hartmann è daventada trais giadas campiunessa svizra en questa disciplina. Ed avant curt ha ella persvadì a la cursa cunter l'ura dal Giro d'Italia cun rang sis. En la cursa sin via duai la Grischuna sustegnair la squadra svizra cun sias qualitads sin terren planiv, sco Swiss Olympic communitgescha.
Marlen Reusser valeva sco ina speranza svizra per far ina medaglia. Als davos gieus olimpics a Tokio l'onn 2021 aveva ella fatg la medaglia d'argient en la cursa cunter l'ura. La Svizra da 32 onns ha gì in'infecziun da virus – e na po dapi dus mais betg far cursas. Era il trenar è sulettamain pussaivel en in tschert quantum.
La carriera ha cumenzà tard
Elena Hartmann è pir dapi dus onns en l'equipa naziunala. Il 2022 ha ella fatg la cursa cunter l'ura dals campiunadis svizzers e ha gist gudagnà il titel – la gronda favurita Marlen Reusser n'era betg stada a la partenza. Ed avant in onn ha Hartmann che viva uss en il chantun Zug, survegnì in emprim contract da profi, tar il Team Israel Premier Tech Roland. Quai è in'equipa svizra da dunnas.
La nova vita sco sportista professiunala ha midà bler en la vita dad Elena Hartmann. Cun reducir fermamain ses pensum da lavur tar la Polizia chantunala da Turitg ha ella pir gì la peda, da sa participar a cursas internaziunalas da plirs dis. L'onn 2023 è la Grischuna stada al Tour de Suisse ed al Tour de France e vitiers a cursas pli curtas sco il Tour de Berlin Feminin. Il punct culminant èn dentant segir stads ils campiunadis mundials a Glasgow. En sia disciplina da parada da la cursa cunter l'ura hai dentant sulettamain tanschì per rang 23 – ed en la cursa sin via ha ella fatg rang 70.
La stagiun actuala ha Elena Hartmann gudagnà la primavaira il Tour El Salvador. En la Spagna è ella daventada 11avla en il classament general da la Volta ciclista a Catalunya Femenina ed il Tour de Suisse 2024 ha Hartmann terminà sin rang 26. Il zercladur è la Grischuna daventada per la terza giada campiunessa svizra da la cursa cunter l'ura – ed en la cursa sin via ha ella manchentà mo per pauc il podest cun rang quatter.
Or da l'archiv:
