Ils ultims onns è il dumber da persunas che sa movan en la natira s’augmentà enorm. Sco Lukas Häusler da l’interpresa Allegra che construescha a moda professiunala «bike trails» di, è il dumber da persunas che sa movan en il liber sa dublegià dapi il 2008. Lura eran circa 3 milliuns persunas cun bike ni peduns sin las vias da viandar. Uss èn quai 6 milliuns, da quai circa 5 milliuns viandants ed 1 milliun bikers. Per vegnir da viver la coexistenza tranter quellas duas gruppas d’interess – stoppian era las vias da viandar correspunder als basegns. Uschia saja per exempel da ponderar tgi che nizzegia talas vias, e co las vias vegnan signalisadas, ha ditg Lukas Häusler. Quai veglian els mussar en quest curs che dura trais dis.
Teoria e suenter la pratica
Ils 11 participants dal curs han l’emprim gì duas uras da teoria – e silsuenter èn els ids ora en la natira per gist realisar en la pratica la savida. Els resentian ina gronda engraziaivladad da las participantas e dals participants, di Lukas Häusler. Per ils blers èsi numnadamain quasi l’emprima giada ch’els survegnan ina scolaziun e tips tge far. Tar l’exempel concret, ina via che maina giu a Flem/Con, vegn fatg pli stretga la via, cun differents obstachels. L’idea è tar quella via che n’è betg signalisada sco via da bike, mabain sco via da viandar, da far pli segira quella. En plirs lieus saja la situaziun nunsurvesaivla, e perquai dovri dapli stortas e obstachels per far pli plauna la via ed uschia augmentar la segirtad per velos e viandants, di Lukas Häusler.
Idea è da promover la sensibilitad
En la teoria èsi savens simpel dad evitar conflicts tranter velo e peduns. Uschia possian ins per exempel signalisar da laschar adatg, ni eventual far vias mo da velo ni mo da viandar. Ma en la pratica vesia la situaziun savens ora autra e qua basegnia quai ina sensibilitad, di Lukas Häusler. E las vischnancas èn la finala responsablas per il mantegniment da las vias, e perquai era ils lavurers da vischnanca. Il cas ideal saja sch’in lavurer da vischnanca saja sez utilisader da las vias, ma quai na saja betg adina il cas. Ed uschia basegnia quai tips e trics tge ch’è insumma pussaivel da far, e cun quest curs sperian els da dar ideas als lavurers. La finala sajan lezs quels che hajan da realisar ils plans, ed a lezs manchia savens era il temp da far quella lavur. Simplamain da dir prenda ina pala e va a far la via, cun gliez na saja quai betg fatg. La finamira saja che las vischnancas vesian la necessitad da far in plan sur plirs onns, tge vias mantegnair ni optimar e silsuenter era dar las resursas da temp als lavurers ch’els possian realisar las ideas, uschia declera Lukas Häusler.
