Cumenzà ha tut avant bun in onn. Elena Hartmann è ida a la partenza a la cursa cunter l’ura dals campiunadis svizzers ed ha gist gudagnà il titel – quai en absenza da la gronda favurita Marlen Reusser. Sinaquai ha Swiss Cycling clamà ella en l’equipa naziunala. E dapi bun dus mais ha la ciclista che viva a Baar (ZG) era survegnì in emprim contract da profi tar il Team Israel Premier Tech Roland, in'equipa svizra da dunnas.
Elena Hartmann: «Igl è tut sco ina paraula»
Cun esser da nov profi ciclista è bler sa midà en la vita da Hartmann. Uschia ha ella er reducì ses pensum da lavur sco policista tar il chantun Turitg sin 20 pertschient. Quai ha era lubì ad ella da prender part tant al Tour de Suisse sco era al Tour de France da las dunnas da questa onn. L'entschatta fanadur ha la Grischuna tranter auter er gudagnà il Tour de Berlin Feminin, ina cursa d'in di sur bun 100 kilometers. A Glasgow va uss in ulteriur siemi en vigur.
Jau n’hai mai gì il siemi dad esser ina ciclista professiunala – ed uss na vuless jau esser nagut auter. Igl è uschè bel ed jau ma legrel mintga di da seser sin il velo.
Da buoba fascheva Elena Hartmann gimnastica ritmica a Cuira. Lura ha ella dà bun 10 onns ballape cun il FC Domat. Pli tard ha ella chattà il plaschair vid il sport da perseveranza. Uschia ha ella fatg blers onns triatlon; quai dentant be sco hobi. L'ir cun velo era dentant gia tar il triatlon sia disciplina preferida.
Duas cursas - duas schanzas
Als campiunadis mundials a Glasgow parta Elena Hartmann gievgia, ils 10 d'avust, a la cursa encunter l’ura cun partenza ed arrivada a Stirling en il nord da Glasgow, e dumengia, ils 13 d'avust, va ella anc a la partenza da la cursa da via sur 154 kilometers che maina da Loch Lomond en il center da Glasgow.
