La Federaziun svizra da ciclists Swiss Cycling è la pli auta instanza en Svizra per il sport da velo. Il reglament sa basa sin l'Uniun da ciclissem internaziunala (UCI). La federaziun ha partì il sport da velo en numurausas disciplinas, en las qualas i dat differentas furmas da cursas. Qua chattais ina selecziun.
-
Bild 1 von 8Legenda: Sin il pumptrack vegn accelerà cun pumpar sin las undas e stortas inclinadas. Keystone, Peter Klaunzer -
Bild 2 von 8Legenda: Ils percurs da cross-country mainan per munts e vals sur ragischs e crappa. Quai en distanzas curtas da mes'ura fin a lungas da passa 100 kilometers. Keystone, Maxime Schmid
-
Bild 3 von 8Legenda: Da cycling e-sports van ils atlets sin hometrainers ch'èn colliads cun ina app che simulescha in percurs da cursa. Keystone, How Hwee Young
-
Bild 4 von 8Legenda: En las cursas da four cross (4X) van quatter atlets dad ina pista cun sigls, undas e stortas inclinadas giu. Keystone, Martin Platter
-
Bild 5 von 8Legenda: Il punct unic en la disciplina dad e-mountainbike è ch'il velo ha in motor da fin a 250 watts. Las cursas datti en differents formats. Keystone, Gian Ehrenzeller
-
Bild 6 von 8Legenda: L'alpine snow bike è ina varianta da downhill ch'ha lieu sin la naiv. Qua ina cursa da Super-G. Keystone, Salvatore di Nolfi
-
Bild 7 von 8Legenda: Las cursas da downhill mainan per ordinari tras in guaud, cumpiglian sigls e mainan sur ragischs e crappa. Keystone, Maxime Schmid
-
Bild 8 von 8Legenda: En la balla da velo vegn giugà cun ina balla da 600 grams en squadras sin gols. Keystone, Eddy Risch
Mountainbike MTB
Il mountainbike u velo da muntogna è in velo cun plimas ch'è concipì per terren malguliv. Uschia han era las cursas correspundentas lieu sin pistas dasper las vias. Las emprimas concurrenzas da mountainbike han gì lieu en ils onns 1970 ed èn lura sa sviluppadas spert. La disciplina roiala dal cross-country fa part dapi l'onn 1996 als gieus olimpics.
Aifer il sport da mountainbike datti furmas da cursas fitg variantas, che pretendan differenta savida ed abilitads sco era furmas spezialas da bikes.
Cross-country
Las cursas olimpicas da cross-country (XCO) èn las pli popularas dal sport da mountainbike. Il percurs consista d'in viadi circular ch'ils atlets u las atletas han d'absolvar pliras giadas. La cursa cumenza cun ina partenza da massa e quel che traversescha sco emprim la lingia da finiziun gudogna. Las cursas duran en general fin 90 minutas, l'intensitad è auta. Il ritmus è d'adattar savens ed il terren maltransibel pretenda ina buna tecnica.
La versiun lunga dal cross-country è il maraton da cross-country (XCM). La cursa po esser passa 100 kilometers e maina da punct A fin punct B. Savens han las cursas lieu en cuntradas alpinas.
La versiun curta sa numna short track (XCC). Las rundas èn pli curtas, be fin dus kilometers e la cursa cuzza bun 20 fin 30 minutas.
In auter format è il cross-country eliminator (XCE). Qua sa mesiran quatter atlets sin in curt percurs. I dat pliras rundas en las qualas concurrents vegnan eliminads in suenter l'auter. A la fin decida il final.
Downhill
Tar il downhill (DH) è la finamira da descender in percurs taiss uschè spert sco pussaivel da sissum fin giudim. I vegn partì individualmain e gudagnà ha quel cun il pli curt temp, sco tar cursas da skis. La disciplina maina per ordinari tras in guaud, cumpiglia sigls e maina sur ragischs e crappa.
L' alpine snow bike (ALP) è ina varianta da downhill ch'ha lieu sin la naiv.
Tar l' enduro (EDR/EDR-E) sa tracti d'ina maschaida da cross-country e downhill. I vegn partì singul u en gruppas. Mintga atlet ha in temp limità da cuntanscher la partenza da l'emprima etappa, tut tenor cun velo u cun ina pendiculara. Tar las etappas che sa numnan stages e van cunzunt a val vegn il temp mesirà. Sch'in participant na cuntanscha betg la partenza en il temp dà avant vegn il temp da la stage augmentà cun il retard. A la fin vegnan ils temps da las quatter fin tschintg etappas adids ed uschia vegn eruì il victur.
Four cross
En las cursas da four cross (4X) van quatter atlets dad ina pista cun sigls, undas e stortas inclinadas giu. Ins po cumparegliar la cursa cin il skicross. La cumpetiziun consista da rundas da qualificaziun e finals. Las cursas èn curtas – 30 secundas fin ina minuta. Ils concurrents èn il medem mument sin la pista, in dasper l'auter.
Pumptrack
Insatge tut auter èn las cursas da pumptrack (PUM). Era qua datti differents formats da concurrenzas. L'uschenumnà pumptrack è ina pista da bots e stortas inclinadas. Questa construcziun permetta da sa muventar cun pumpar, pia smatgar e trair ed è uschia ina disciplina che dovra abilitads tecnicas.
E-Mountainbike
Ina giuvna disciplina è l' e-mountainbike (E-MTB). Quella n'è betg speciala pervi da la pista, mabain pervi dal velo. Ils atlets e las atletas han a disposiziun in velo cun motor electric che dastga avair ina prestaziun da fin a 250 watts e permetta ina spertadad da 25 kilometers per ura. Midar la battaria durant la cursa è scumandà.
La pista è la medema sco tar cursas XCO, pia la versiun olimpica da cross-country, e vegn absolvida en pliras rundas. La cursa cumenza cun ina partenza da massa e l'emprim en l'arrivada ha gudagnà.
Cycling e-sports
Tar questas cursas van ils atlets e las atletas sin hometrainers ch'èn colliads cun ina app. Questa app simulescha ina cursa ch'els vesan sin in monitur. Quest sport è oriundamain sa sviluppà or dal basegn da trenar endadens l'enviern. Per ch'i na vegnia betg lungurus da pedalar uras persul senza vesair in resultat han fans da velo programmà in simulatur ed integrà la cumpart online uschia ch'ins po trenar cun auters ciclists e ciclistas via la rait. Pliras apps èn disponiblas per in e scadin e pon vegnir utilisadas cun in hometrainer u cun rollas da montar il bike.
Balla da velo
En la balla da velo vegn giugà cun ina balla da 600 grams en squadras sin gols. Mintga giugader sesa sin in velo spezial, giugada vegn la balla per regla cun la roda davant. En la varianta da balla da velo la pli populara consista ina squadra da dus giugaders; i dat dentant era balla da velo da tschintg e sis. Ina partida da la balla da duas ciclistas dura duas giadas set minutas. Giugar dastga be quel che ha ses mauns vi dal guvernagl ed ils pes sin ils pedals. Excepziun è in gugader che sa chatta en la zona da chasti, lez dastga pigliar la balla cun ils mauns.
Funtaunas
Or da l'archiv: