Pertutgadas èn quatter lingias: Las duas ferm frequentadas èn Cuira-Lai (lingia 182) e Cuira-Flem/Laax (lingia 81). Las ulteriuras èn da Lai-Tavau (lingia 183) e Lai-Zorten (lingia 184). Mintg'auto da posta ha per regla in indriz che porscha plaz per tschintg velos davostiers da l'auto da posta. Damai ch'igl ha era gia dà situaziuns, nua che tuttas tschintg plazzas eran gia occupadas, han bikeras u bikers era gia gì da spetgar sin la proxima posta. Per far frunt a quai vul AutoDaPosta testar in nov sistem da reservaziun.
Il responsabel da l'AutoDaPosta, Kurt Willi, è er in biker che va savens cun il traffic public ed enconuscha la problematica. El è sez era gia stà en lieus nua ch'el ha gì da cumbatter per in plaz cun ses velo tar l'auto da posta. Tenor el fruntan uss quels dus munds in sin l'auter, quel da quels che chattan bun d'avair in plaz sin segir e quels che chattan schlet ch'els ston anc pajar dapli.
Quests dus munds fruntan uss in sin l'auter ... ma quels dus francs èn per evitar ina no-show.
La reservaziun è obligatorica durant il temp da la fasa da test. Ella è integrada en l'applicaziun da la SBB, nua ch'era tut tschels bigliets necessaris pon vegnir fatgs. Vul dir, tgi che va cun velo en il traffic public dovra in bigliet per sasez, in da mesa taxa per ses velo – ed uss er anc sin ils trajects numnads sura ina reservaziun da velo da 2 francs. Possessuras e possessurs dal GA da velos ston era pajar quests dus francs supplementarmain.
Nus avain sentì il puls dals bikers, betg tuts èn cuntents cun questa soluziun:
-
Bild 1 von 3Legenda: Domeni Tscharner, va a lavurar cun il bike «Sch'jau vulessel prender mes velo a chasa èn quai svelt ina giada 10 francs il di ... Quai èn lura per mai memia blers raps damai ch'jau hai gia pajà 260 francs per il GA da velo.» RTR -
Bild 2 von 3Legenda: Marlon Rüfenacht, biker da Brugg «Uschia han ins segir adina in plaz. Ma igl è stentus da reservar sch'ins va be in stop cun l'auto da posta.» RTR
-
Bild 3 von 3Legenda: Samuel Nyffenegger, biker da Cuira «Las fins d'emna dal temp da truscha èsi segir bun. Durant l'emna èsi la dumanda sch'igl è necessari.» RTR
Ils responsabels da l'AutoDaPosta ensemen cun auters dal traffic public evalueschan adina puspè da nov la situaziun ed emprovan, da chattar la meglra schliaziun per tuts involvads, di Kurt Willi. Era agiunta el ina pussaivla integraziun dals dus francs en il GA da velos. Schebain la reservaziun vegn a restar u betg vegn decidì suenter che la fasa da test è ida a fin.