Cun las set medaglias gudagnadas, trais dad aur, trais d'argient ed ina da bronz, triumfescha la delegaziun svizra era en la survista da las medaglias. Quai avant la Norvegia, che ha cun total nov medaglias, bain gudagnà las bleras da tut las naziuns, ha dentant ina dad aur damain che la Svizra. Swiss Ski n'aveva mess naginas finamiras da medaglias avant ils campiunadis. Cler che quellas eran insanua grondas, suenter las fermas prestaziuns ed ils blers podests e victorias quest enviern. Urs Lehmann, il president da Swiss Ski, è satisfatg e fa ina bilantscha positiva:
Als campiunadis mundials da skis, avant dus onns a Cortina, era la Svizra turnada cun total nov medaglias. Dentant be sin il segund plaz, davos l'Austria, che sto magunar da turnar da la Frantscha senza ina suletta medaglia dad aur e be plaz otg en la survista da medaglias.
Qua la survista e cronologia dals campiunadis mundials:
Argient per Holdener
Ils campiunadis han cumenzà bain per la Svizra. Tar l'emprima concurrenza, la cumbinaziun alpina da las dunnas, ha Wendy Holdener fatg l'emprima medaglia d'argient. Silsuenter n'hai dentant betg funcziunà sco giavischà. Ni tar la cumbinaziun dals umens, ni tar ils super-G's han ils favurits svizzers cuntanschì il podest. Meglier Svizzer da la cumbinaziun è stà Loïc Meillard sco 6avel.
Tar il super-G da las dunnas ha Lara Gut-Behrami be manchentà il podest per 4 tschientavels, ed è la fin finala era stada 6avla. Pli stretg èsi stà tar ils umens. Marco Odermatt è vegnì quart, gudagnà ha surprendentamain James Crawford dal Canada.
Segunda medaglia per Holdener
Tar il slalom gigant parallel singul la mesemna ha Wendy Holdener pudì festivar in grond success. Be cunter la Norvegiaisa Maria Tviberg ha ella pers en il final. Uschia ha ella gudagnà sia segunda medaglia d'argient als campiunadis mundials en Frantscha.
Tar l' event da team dal mardi n'ha la Svizra betg pudì persvader. Suenter gudagnar l'otgavelfinal encunter la Lettonia èsi stà a fin en il quartfinal. Malgrà a las duas cursas gudagnadas da Wendy Holdener e Livio Simonet, n'hai la fin finala betg tanschì cunter il Canada.
Las cursas da medaglias
Grondas victorias en las cursas rapidas
Jasmine Flury ha gudagnà la cursa rapida. Ella è partida sco segunda ed ha pudì defender il plaz sisum il podest fin la fin da la cursa. In resultat ch'è era vegnì festivà en la patria grischuna, a Tavau . Corinne Suter è vegnida terza en la disciplina roiala, uschia ch'igl ha gist dà duas medaglias svizras quest di.
La dumengia ha alura Marco Odermatt procurà per il proxim highlight. Cun ina cursa bunamain perfetga è el sa mess a la testa dal classament. Sin il podest èn anc stads ses grond rival norvegiais Aleksander Kilde (+0,48 secundas) ed il Canadais Cameron Alexander (+0.89 secundas).
Triumf en il slalom gigant
Suenter che Lara Gut-Behrami ha puspè manchentà ina medaglia per be 9 tschientavels en il slalom gigant da las dunnas, hai dà ina victoria dubla svizra tar ils umens. Marco Odermatt gudogna sia segunda medaglia d'aur als campiunadis, argient va a ses cumpatriot Loïc Meillard.
Trumpada da slalom
Wendy Holdener ha manchenta sia terza medaglia als campiunadis. Suenter ses segund plaz en l'emprim percurs, è ella crudada ora suenter in temp intermediar pli spert che St Germain, la Canadaisa ch'ha gudagnà surprendentamain.
En la davosa cursa dals campiunadis n'han ils Svizzers betg cuntanschì il metal prezius. Daniel Yule, Marc Rochat e Ramon Zenhäusern, che n'han gì in bun emprim percurs n'han er betg pudì far il sigl necessari en il segund percurs. Gia en l'emprim percurs è Loïc Meillard, ch'è parti sco emprim, crudà ora tar la terza porta.
