Event da Team - Terrada per la Svizra cun Livio Simonet
Suenter avair declassà la Lettonia en l'emprima runda ha il quartet svizzer cun Wendy Holdener, Andrea Ellenberger, Semyel Bissig ed il Grischun Livio Simonet pers il duel encunter ils Canadais. Malgrà che Simonet da Casti ha egualisà en quest duel al 2:2 ha il temp decidì a favur dals Canadais.
En il duel per aur han ils Americans battì ils Norvegiais ch'avevan triumfà als davos campiunadis mundials avant dus onns a Cortina d'Ampezzo. En il davos duel decisiv ha l'American Tommy Ford er profità che ses concurrent norvegiais, Timon Haugan, è stà pendì en a la partenza ed ha uschia pers bler temp.
En il final pitschen, il cumbat per la medaglia da bronz, han ils Canadais battì ils Austriacs che ston uschia sa cuntentar cun il quart plaz.
Co funcziuna l'event da team?
Avrir la boxSerrar la box
16 equipas cumbattan en in turnier da slalom gigant parallel. Quatter curriders e curridras encunter quatter d'ina autra naziun. La naziun cun dapli puncts vegn en la proxima runda.
Schi stat 2:2 quinta la summa dal meglier temp dals umens e da las dunnas.
L'event da team ha gì premiera als gieus olimpics 2018 a Pyeongchang. Là ha la Svizra gudagnà aur.
