Er la segunda medaglia dad aur da las dunnas als Campiunadis mundials da skis a Courchevel/Méribel va a l'Italia. Suenter che Federica Brignone ha triumfà en la cumbinaziun alpina gudogna sia cumpatriota Marta Bassino il super-G. Per la differenza ha Bassino procurà en la part tecnica nua ch'ella ha declassà l'entira concurrenza. Per Bassino, lura er ina da las grondas favuritas en il slalom gigant, èsi fin oz il pli grond success da la carriera. L'emprima medaglia datti er per l'Americana Mikaela Shiffrin che gudogna argient. Bronz va a duas skiunzas cun il medem temp, Kajsa Vickhoff Lie da la Norvegia e l'Austriaca Cornelia Hütter.
- Marta Bassino (ITA) 1:28.06
- Mikaela Shiffrin (USA) +0,11 secundas
- Kajsa Vickhoff Lie (NOR) e Cornelia Hütter (AUT) +0,33 secundas
Nagina medaglia per las Svizras
Lara Gut-Behrami manchenta in'ulteriura medaglia en sia carriera per be 4 tschientavels, ella vegn 6avla e na vegn uschia betg da defender il titel. Avant dus onns a Cortina d'Ampezzo aveva la Tessinaisa gudagnà aur tant en il super-G sco er en il slalom gigant.
La Grischuna Jasmin Flury, ch'è stada malsauna ils ultims dis avant ils campiunadis mundials, n'ha gì nagina schanza da cumbatter per ina medaglia.
- 6. Lara Gut-Behrami +0,37 secundas
- 10. Michelle Gisin +0,69 secundas
- 13. Joana Hählen +0,80 secundas
- 20. Corinne Suter +1,56 secundas
- 22. Jasmine Flury +1,67 secundas
