Cun il Solarexpress vul la Confederaziun promover tant pli spert grondas ovras solaras en il territori alpin. Per che las producentas d'electricitad possian bajegiar questas ovras solaras, ston ellas survegnir il consentiment da las vischnancas, pli precis da la populaziun. Uschia che l'onn 2023 è stà l'onn da las votaziuns d'ovras solaras.
L'onn 2023 hai dà en tut 10 votaziuns communalas davart grondas ovras solaras. Set projects han survegnì il consentiment dal suveran communal, a trais ha il suveran dà in chanaster. Cunquai che las ovras solaras stuessan esser vid la rait enfin la fin dal 2025 e producir in tant electricitad per profitar da las subvenziuns federalas, èn las producentas d'electricitad sut squitsch. Tut sto ir spert, ina sfida er per las vischnancas, las votantas ed ils votants.
Set projects han superà las votaziuns, trais betg
Bain che las votaziuns èn in da plirs obstachels avant che grondas ovras alpinas pon vegnir realisadas en il territori alpin, fan enfin qua ils suandants projects:
- Ovra solara sin il Vorab, Laax
- Ovra solara tranter plazza aviatica e Flaz, Samedan
- Ovra solara Scharinas e Nalps, Tujetsch
- Ovra solara Motta Naluns, Scuol
- Ovra solara Madrisa, Claustra
- Ovra solara Alp Magriel, Mustér
- Ovra solara en il territori da Parsenn, Tavau
Naufragi a l'urna u a la radunanza communala han ils suandants projects fatg:
- Ovra solara Alp Run, Mustér
- Ovra solara Alp da Rueun, Glion
- Ovra solara Alp da Schnaus, Glion
Davart il pli grond project, quel en la Val Nandro sin il territori da la vischnanca Surses, ha il suveran da votar l'onn proxim.
