Per l'implant solar Madrisa, planisà sur Claustra en il Partenz ha la regenza grischuna dà la lubientscha da construcziun. Quai communitgescha la regenza en il Fegl uffizial chantunal. I sa tracta d'in project cuminaivel da la Repower, da la vischnanca da Claustra e da las Pendicularas Claustra-Madrisa SA.
58% Gea als plans per l'implant solar
Il davos d'october 2023 han las votantas e votants da Claustra approvà ils plans per in’implant solar e decidì da sa participar finanzialmain. Cun 58% ha il suveran da Claustra approvà la construcziun d’in implant solar sin il territori Züg a Madrisa. En in’ulteriura votaziun ha la vischnanca concedì in credit per contribuir a 34% dal chapital d’aczias da la societad da l'ovra.
Cun quai veglia la vischnanca cundecider en dumondas strategicas e profitar d’eventualas dividendas, uschia infurmescha il messadi da votaziun. La maioritad d’aczias vegnia la Repower SA a tegnair.
![Solarmodule Madrisasolar](https://www.rtr.ch/static/cms/images/960w/99b4da.jpg)
Ultra da quai prevesa il contract tranter la vischnanca e la Madrisa Solar SA ina indemnisaziun da basa da 0,75 raps per ura kilowatt. En tut vegnia l’implant a producir 17 uras gigawatt, avunda per 3’400 chasadas. Il lieu saja accessibel sur vias ed è en vischinanza da la staziun da las pendicularas Madrisa.
Il project sa basa sin l'art. 71a da la Lescha federala d'energia, l'uschenumnà «Solarexpress». Quest artitgel è vegnì stgaffì dal Parlament federal l'atun 2022 cun la finamira da pudair realisar uschè svelt e nuncumplitgà sco pussaivel implants fotovoltaics gronds autalpins. Igl è previs che l'implant po profitar da la participaziun finanziala da la Confederaziun en il rom dal Solarexpress ch’il Parlament svizzer ha decis la stad 2023. En tut vala il contract per 67 onns, suenter ha la vischnanca la pussaivladad d’acquistar l’implant.