Nandro Solar - Pli concret per plaschair!

L'Ovra electrica da la citad da Turitg (EWZ) ha infurmà la populaziun davart ils plans per in implant fotovoltaic autalpin en la vischnanca da Surses. Cumenzar cun las lavurs da construcziun pudess ins la primavaira 2025. L'indriz cun 93’000 moduls da solar è planisà en la Val Nandro datiers dal territori da skis Savognin.

L'indriz duai producir 68 uras gigawatt ad onn. Quai fiss 2,5 giadas uschè blera electricitad sco quai che la vischnanca da Surses dovra, inclusiv las pendicularas.

Informaziun per la populaziun

Mardi saira èn passa 300 persunas rivadas en la sala Grava a Savognin per l'infurmaziun da la populaziun davart l'ovra solara autalpina che la EWZ planisescha. Suenter l'infurmaziun n'hai betg dà grondas dumondas. Resumà stuessan ils avantatgs per la vischnanca vegnir pli concret sin maisa e la dumonda da l'indemnisaziun stuess vegnir sclerida definitivamain, per ch'ils da Surses pudessan pasantar avantatgs e dischavantatgs per lura decider.

Las tractativas cun l'EWZ n'èn anc betg a fin – actualmain pudessan las indemnisaziuns per la vischnanca esser tranter 500'000 e 700'000 francs ad onn per il dretg da construcziun, ulteriuras indemnisaziuns pudessan vegnir vitiers. Cler è, ch'i sto guardar ora insatge per la vischnanca per ch'i possia dar in Gea a l'urna. La votaziun è planisada per ils 11 da december. Cunquai ch'il temp è fitg stretg vegn actualmain examinà sch'ins possia stuschar enavos il termin sin l'entschatta da l'onn proxim, ch'ins havess dapli peda per far ponderaziuns.

In lieu cun blers avantatgs

La Val Nandro saja in lieu ideal per in implant fotovoltaic autalpin, hai num. Tar ils avantatgs tutgian ina gronda irradiaziun dal sulegl era durant l'enviern. Plinavant possia vegnir utilisada là l'infrastructura existenta da l'ovra idraulica pitschna Nandro. E da la val anora sajan las surfatschas visiblas be en moda limitada.

Era l'alpegiaziun na duess betg vegnir impedida atras l'ovra solara. La vischnanca da Surses pudess profitar dal project. Ins saja amez las contractivas sco il president communal da Surses Leo Thomman di.

Sco proxim èsi previs d'infurmar la populaziun davart il project, quai ils 24 d'october. Previs è er in indriz da test. Il schaner 2024 pudess l'EWZ lura inoltrar la dumonda da construcziun.

Avertura a partir da l'onn 2028

Cun las lavurs da construcziun che duain durar trais onns vul l'EWZ cumenzar la primavaira 2025. Gia la fin da l'onn 2025 duai l'implant ir en funcziun parzialmain, e gia furnir 10 pertschient da l'entira producziun.

Gruppas d'interess sco la corporaziun d'alp Val Nandro, la suprastanza communala da Surses, las pendicularas da Savognin u er uniuns d'ambient sco Pro Natura u WWF sajan vegnidas integradas a temp en la planisaziun.

Sper il project en Surses planisescha l'EWZ in ulteriur implant solar a Valragn GR. Il cussegl da la citad da Turitg ha approvà expensas unicas dad 1,7 milliuns francs per la projectaziun.