Il suveran dad Ilanz/Glion ha tramess dal Rain giu ils projects solars sin las alps da Rueun e Schnaus. Gia ordavant hai dà blera critica e dumondas avertas da la populaziun. Il president communal Marcus Beer e l'Axpo n'han betg pudì persvader a l'orientaziun publica dals 9 da november.
Il project Alp da Schnaus è refusà cun 1021 Na encunter 606 Gea ed il project Alp Rueun è refusà cun 1028 Na cunter 602 Gea.
Resultat cler – fin defintiva per ils projects cun l'Axpo
Nagin n'aveva spetgà che 62% da la populaziun voteschia encunter las ovras solaras. Era da la vart da l'Axpo n'hajan ins betg quinà cun in resultat uschè cler, ha ditg la pledadra da medias Jeanette Schranz. Malgrà ch'ils lieus fissan ideals, grazia a lur spundas suleglivas era durant l'enviern, èn ils projects cun questa decisiun giud maisa.
L'Axpo persequiteschia però vinavant l'offensiva solara. En las vischnancas da Tujetsch e Mustér hajan els gia pudì generar resultats postivis a l'urna, uschia la pledadra vinavant.
Il resultat è cler. Il votum da la populaziun è ch’ella na vul betg sustegnair da quels projects sin territori da la vischnanca dad Ilanz/Glion.
Il resultat fa surstar mai en il senn positiv. Jau hai pensà ch’il resultat vegnia pli stretg, ch’i pudess forsa era ir sin l’autra vart.
Cun la decisiun desista la populaziun da Ilanz/Glion sin entradas annualas dad in mez milliun francs. In fatg che vess meglierà la situaziun tendida da la vischnanca.
La situaziun è uschia che nus vegnin a stuair spargnar. Il parlament vegn er a pretender quai da nus. Nus avain naginas alternativas. U spargnar u generar novas entradas. I dat mo quellas duas pussaivladads.
Sch’ins mira ch’igl è ussa vegnì augmentà la paja als collavuraturs, cura ch’ins na stat betg bain. Quai fa ora in pèr tschient milli francs che mancan en cassa da vischnanca. E lura fan ins festas da giubileum e da quellas chaussas.
Planisads fissan stads implants per producir forza electrica regenerabla per 13'200 chasadas. L'express solar da la Confederaziun vegn uschia a cuntinuar senza la vischnanca dad Ilanz/Glion.
