Circa 200 ovras solaras, che producissan duas uras terawatt , èn la finamira dal Cussegl federal. Da quai èn gist 3,3% ids a perder suenter il Na a la radunanza communala a Surses . En autras vischnancas sto il suveran anc decider en chaussa.
Mesemna vegn Albinen (VS) a votar davart in'ovra. E l'Axpo planisescha en Glaruna, a Friiteren, in'ovra che produciss 13 uras gigawatt. La votaziun duai suandar la primavaira dal 2024. Tar auters projects sco per exempel tar il Bernina Solar sto anc vegnir chattà in nov gestiunari. Ed a Spleia e Zuoz datti pir plans ed anc nagins termins concrets.
L'uschenumnà Solarexpress ha pers in pau tempo. Las vischnancas han en mintga cas pliras giadas franà el, per exempel Glion e per part Mustér . A Scuol (52% Gea), Poschiavo e Claustra èsi mintgamai stà stretg tar las votaziuns. Ed ina da las pli enconuschentas ovras, Grengiols en il Vallais, è pir vegnida acceptada suenter ina reducziun substanziala. Er in'ovra approvada ad Adelboden n'è cun 17 uras gigawatt betg fitg gronda, e contribuescha stgars 1% a las finamiras dal Cussegl federal.
Er a Saanen en il chantun Berna ha la radunanza communala decis cunter in'ovra solara. Persuenter ha Sedrun gia inoltrà ina dumonda da bajegiar . Ed er a Tavau e sin il Vorab èn ils plans gia s'avanzads e vegnan sustegnids da la populaziun. Da tegnair en il plan da temp e da metter vi da la rait las ovras gia il 2025 cun 10% da la prestaziun resta dentant ambizius.
Indemnisaziuns
Entant tschernan las vischnancas differentas vias , tge che pertutga indemnisaziuns. A Claustra survegn la vischnanca 0,75 raps per ura gigawatt producida, vul dentant er sa participar a la gestiun. Tavau survegn ina indemnisaziun variabla, tut tenor gudogn tras l'ovra. La vischnanca a Lütschental (BE) ha negozià 1,3 raps per ura gigawatt, scriva la NZZ am Sonntag. Ils custs da construcziun vul la Confederaziun surpigliar per 60%, dentant mo sche las ovras tegnan en il plan dal temp.
A Surses spetga en il futur gia il proxim project en connex cun ils plans da segirar il provediment d'energia. Il mir da fermada da Marmorera pudess vegnir engrondì e vegnir 14 meters pli aut.