Il svilup economic saja stà pli bass che spetgà. Quai communitgeschan la gruppa austriaca Jufa e la gruppa d'interpresas ITW dal Principadi da Liechtenstein ch'è possessura dals bajetgs da l'hotel a Savognin. Bain haja dà grond sustegn da la regiun – la pandemia da corona e las consequenzas hajan però franà la strategia d'expansiun.
Enstagl da 11'500 pernottaziuns avain nus 7'000 pernottaziuns.
Anc fin la fin da la stagiun da stad cun Jufa
Il manaschi maina la gruppa Jufa anc enfin la fin da la stagiun da stad. Ins vegnia a far tut il pussaivel, per ch'il manaschi possia cuntinuar a partir da la proxima stagiun d'enviern cun in nov gestiunari. Tgi che quai pudess esser, n'è però anc betg cler. Era las abitaziuns da vacanzas da la residenza Grava vegnan actualmain manadas da la gruppa Jufa e duain ir – sco l'hotel – vi tar in nov gestiunari. Sche pussaivel duai era l'entir persunal vegnir surpiglià. La finamira per l'ITW, sco possesura, saja cleramain da manar enavant il manaschi senza interrupziuns.
L'hotel resta en mintga cas avert.
«Donn, ma chapaivel»
Quai di Luzi Thomann, il president da la Turissem Val Surses Savognin Bivio SA. La gruppa Jufa haja gì grevas cundiziuns da partenza cun metter ad ir il manaschi gist durant e suenter la pandemia da corona. La gestiun da l'hotel saja stada ina fitg buna partenaria ed ins haja gì ina buna collavuraziun.
Per l'avegnir è Luzi Thomann tuttina optimistic e persvas che l'ITW sco possessura chatta l'organisaziun u la persuna che mainia vinavant l'hotel. Els speran che la collavuraziun cuntinueschia en la buna furma da fin qua.
Che quella midada nunspetgada pudess donnegiar la reputaziun da l'hotellaria a Savognin na crai il president da l'organisaziun turistica betg. I dettia er exempels d'hotels che girian bain. E cun l'auter hotel en mauns austriacs ch'haja fatg naufragi – il Cube – na possian ins betg cumparegliar questa situaziun.
Pir dacurt midà direcziun
Dapi il fanadur 2024 è Sandro Zollinger nov directur da l'hotel a Savognin. Anc il settember passà aveva el communitgà sias finamiras da vulair attrair dapli giasts da l'exteriur e d'occupar meglier l'hotel durant la stad. Plinavant ha el instradà in nov partenadi cun il club da golf – e las 12 abitaziuns da vacanzas ch'eran vegnidas bajegiadas a fin sin l'enviern 2024/2025 che l'hotel administrescha era.
Hotels a Savognin – in'istorgia cun divers chapitels
Diversas lingias grassas hai dà ils ultims onns adina puspè pervi da l'hotel Cube, gist dasper la staziun a val da las pendicularas. Sco ultim ha il possessur però ademplì las pretensiuns da la dretgira regiunala per evitar la liquidaziun ch'era avant esch.
Midadas hai er dà dacurt tar l'hotel Piz Mitgel:
Gia plirs onns en planisaziun e discussiun è il ressort Viols dasper il Lai Barnagn:
Ed il Hotel Arlos ha gì da serrar, perquai ch'ins n'ha chattà nagina successiun.
Era organisaziuns turisticas fan quitads
Insumma na pari plitost d'esser ina sfida da surviver per l'hotellaria e gastronomia en la regiun da Savognin: