Hotel Arlos a Savognin - Albert Hengartner: «Lavurar mo 80% na tanscha betg»

Actualmain ha il possessur da l'hotel Arlos a Savognin publitgà in inserat en l’internet. Albert Hengartner tschertga in ustier u in pèr che vul manar l'hotel cun 14 chombras. Impurtant saja surtut da porscher ina buna cuschina. Mo manar in «bed and breakfast» sco ch’i saja gia vegnì proponì ad el, quai na vegnia betg en dumonda. Sco che Hengartner ha ditg, saja ozendi grev da chattar persunas che veglian lavurar a temp cumplain e s’engaschar cun corp ed olma per in hotel. Blers veglian ozendi mo lavurar en temp parzial. La dumonda per la restauraziun saja pitschna il mument, quai valia era per la prontadad da lavurar las fins d’emna.

A Savognin n'è l'hotel Arlos betg il sulet ch'è actualmain serrà. Er l'hotel Cube, dasper las pendicularas ha serrà las portas dapi dus onns.